Cebuano news: President Aquino miaprubar sa pagmugna og Mindanao Power Monitoring Committee

By Susil D. Ragas

Friday 3rd of August 2012

SURIGAO CITY, Agosto 3 (PIA) -- Gipagawas ni Pangulong Benigno S. Aquino III ang Executive Order No. 81 aron mugnaon ang Mindanao Power Monitoring Committee (MPMC) nga maoy molihok sa tanang mga inisyatibo nga gitumong aron mapalambo ang suplay sa enerhiya sa southern region o habagatang bahin sa nasod.

Matud ni Executive Secretary Paquito N. Ochoa Jr. kagahapon Huwebes nga ubos sa maong EO 81 nga gipirmahan ni Pangulong Aquino niadtong Hulyo 30, ang MPMC maoy magmonitor, maghiusa ug mag-apil sa mga rekomendasyon nga gisugyot aron matubag ang mga problema sa sektor sa industriya sa enerhiya sa Mindanao.

“The President approved the formation of the MPMC since there is a need for a team or a body that will study the feasibility of recommendations to address the power situation in Mindanao,” matud pa ni Ochoa. “It will ensure that coordination and monitoring are in place to better the power situation in Mindanao.”

Ang Mindanao Development Authority (MinDA), diin naestablisar ubos sa Republic Act No. 9996 ug kasamtangang gipangulohan ni Luwalhati Antonino, maoy modumala sa MPMC ug usab maoy magsilbing secretariat.

Ang uban pang mga miyembro sa MPMC mao ang Department of Energy, Energy Regulatory Commission, National Electrification Administration, National Power Corporation ug ang Power Sector Assets ug Liabilities Management Corp. Ang mga representante gikan sa Mindanao Electric Power Alliance ug Association of Mindanao Rural Electric Cooperatives giawhagan ug gidasig usab nga mamahimong mga miyembro sa komitiba.

Gihatagan og direktiba ni Pangulong Aquino ang MPMC aron mougmad og database kalabot na sa impormasyon mahitungod sa sector sa enerhiya sa Mindanao, abagan ang sitwasyon sa enerhiya sa rehiyon ug tan-awon ang posibilidad sa mga rekomendasyon nga gisugyot human sa Mindanao power summit, ug lain pang uban.

Ang mga ahensya sa gobyerno, lakip na ang state-owned ug controlled nga mga korporasyon, gimandoan usab aron abagan ang MPMC sa paghimo sa mandato niini.

Matud ni Ochoa, ang inisyal nga pondo sa MPMC magagikan sa contingent fund ug uban pang mga tinubdan nga sotaon sa Deparment of Budget and Management. Ang sunod nga budget sa MPMC mahiusa na sa regular appropriation sa MinDA.
Ang EO No. 81 epektibo gyud dayon human kini nga mapublisar sa mantalaan libot dinhi sa nasod. (PIA-Surigao del Norte)