SYUDAD SANG ILOILO (PIA) — Nagmando ang administrasyon ni Presidente Ferdinand R. Marcos Jr. sa pagpatigayon sang whole-of-government approach agud mabuligan ang mga Pilipino nga marino nga gin-atake sang mga Houthi nga rebelde sa Red Sea.
Sa isa ka news forum, ginpahayag ni Department of Migrant Workers (DMW) Secretary Hans Cacdac nga ang Department of Foreign Affairs (DFA) nagapangabudlay sing suod sa foreign counterparts para sa paghilway sang 17 ka mga Pilipino nga marino nga gindakop sang mga Houthi nga rebelde sang nagligad nga tuig.
“The ongoing effort to secure their release being undertaken through the DFA – the DFA is communicating with foreign governments who have communication line with Houthi rebels with the objective of securing the release of our seafarers and bringing them home safely,” pahayag ni Cacdac.
Lapit sa 17 ka mga marino nga Pilipino ang naapektuhan sang gin-atake sang mga rebelde ang ila barko nga Galaxy Leader.
Ang kutob naman sa mga marino nga Pinoy nga nagsampa sa True Confidence ang gin-atake man sang mga rebelde, kun sa diin, suno kay Cacdac 11 sa ila ang nakapauli na sing masulhay. Samtang, duwa naman ka mga Pinoy ang napatay sa ina nga atake.
Ginpahayag man nga nagbulig ang mga overseas foreign experts sa pagproseso sang duwa ka bangkay, samtang, ang mga pamilya sang biktima ang ginpahibalo na tuhoy sa development antes nga ginbalik papuli ang mga bangkay.
“So, the return of the two seafarers’ remains are expected to be home soon,” sambit ni Cacdac.
Dugang pa, ang dayon nga paghikot sang mga nanari-sari nga ahensya sang gobyerno kag ang mga foreign counterparts sini ang nagresulta sa madasig nga pagluwas sang 21 gikan sa 22 ka mga marino nga Pinoy nga nagapanakayon sa MV Tutor sang ini ang gin-atake sang Houthi nga grupo sang Hunyo 12.
Suno kay Cacdac, nag-abot ang rescue team sang wala pa malab-utan 24 oras matapos nga nagmando si Presidente Marcos nga salbaron sila sa katalagman. (AAL/LMLE/PIA Iloilo/PND)
