SYUDAD SANG ILOILO (PIA) — Isa ang probinsya sang Iloilo sa 10 ka mga local government units nga nagpasakop sa ika-126th Independence Day nga selebrasyon sang Hunyo 12, 2024 sa Manila, lamang nga nagpakita ang ini nga kahiwatan sang malig-on nga panumpa sa pag-amlig sang kahilwayan sang pungsod.
Ginpangunahan ni Gov. Arthur Defensor Jr. kag Vice Gov. Christine Garin ang bug-os nga delegasyon sang probinsya sa kahiwatan sang Flag Raising Ceremony sa Rizal Park.
Kaupod man sini kanday Provincial Administrator Raul Bañas, mga miyembro sang Sangguniang Panlalawigan, alkalde, hepe sang mga departamento sang gobyerno probinsyal, kag miyembro sang mga komite.
Nagpasakop man ang probinsya sang Iloilo kaupod ang banwa sang Sta. Barbara ka mga ahensya sang gobyerno sa ginhiwat nga Parada ng Kalayaan: Grand Parade of Local Government Floats sa Quirino Grandstand.
Ang nasambit nga float ang nagpasundayag sang “Cry of Sta. Barbara” kag “Establishment of the Federal State of the Visayas.”
Suno kay Gov. Defensor, ang disenyo sang float nagpakita sang bilidhon nga simbolo kag mga lugar nga naga-unod sang maragtason nga importansiya sang probinsya sa pag-angkon sang kahilwayan.
“This is historic for us because this is the first time that we were invited to join the parade at the national,” pahayag ni Defensor.
Ang pagpakigbahin sang probinsya sang Iloilo ang naangot sa Department of the Interior and Local Government (DILG) Administrative Order No. 8 Series of 2023 nga nagapatuman sa pagsakdag sang pagdumdum sang Anniversary of Philippine Independence and Nationhood sugod 2023 tubtub 2026.
Nalakip sa 10 ka mga LGUs nga nagpasakop sa float parade amo ang Candon City in Ilocos Sur, Cebu, Cavite, Aurora, Bulacan, Negros Occidental, Iloilo, Surigao del Norte, Jolo sa bahin sang Sulu, kag Zamboanga City.
Dugang pa, ang ini nga mga LGUs ang nakilala sa mga makasaysayan nga hitabo nga nagtuga sang pagpatukod sang nahauna nga Republika sang Pilipinas. (AAL/LMLE/PIA Iloilo)
