SYUDAD SANG ILOILO (PIA) – Nagsugod na ang 100-day countdown para sa pagsaulog sang madinu-agon, grandiyoso kag ginabantayan nga selebrasyon sa syudad sang Iloilo – ang Dinagyang Festival 2025.
Sa ginhiwat nga 100-day countdown celebration sang Oktubre 18, 2024, ginpahayag sang Iloilo Festivals Foundation Inc. (IFFI) nga lauman sang mga tumalan-aw ang mas masadya nga selebrasyon pinaagi sa maanyag nga performances sang mga tribu kag ang mga manamit nga pagkaon sang Iloilo.
“Dinagyang is more than just a celebration, it is a vibrant expression of our culture and deep-rooted connection to Senior Sto. Niño. It is the time when we come together as a community to honor our heritage and showcase the incredible talents of our people. Over the next 100 days, we will experience series of thrilling activities, colorful parades – from captivating pasinadyas and mouth-watering food here in Iloilo,” pahayag ni IFFI President Allan Ryan Tan.
Walo naman ka mga grupo ang ginalauman nga makipagbahin sa Tribes Competition nga ginalakipan sang Tribu Paghidaet; Tribu Salognon; Tribu Parianon; Tribu Ilonganon; Tribu Pag-asa Kang Mandurriao; Tribu Hangaway; Tribu Molave; kag Tribu Pan-ay.
Nagaplano man ang IFFI kag Iloilo City government nga mag-imbitar sang iban pa nga lighted-festivals sa pungsod para magpasakop sa Dinagyang ILOmination; samtang ginalauman man ang mas madako nga selebrasyon sang Kasadyahan sa Kabanwahanan nga pamunu-an sang Iloilo provincial government.
Magasentro ang selebrasyon sang Dinagyang Festival 2025 sa tema nga, “Buhi nga Pagtuo sa Kinabuhi sang mga Ilonggo”. (AAL/JNH/PIA Iloilo)
