CAMIGUIN (PIA)–Sa paghatag og pasidungog sa mga nawad-an sa ilang kinabuhi o grabeng naangol sa mga aksidente sa kadalanan ug pagpataas sa kaamgohan bahin sa kaluwasan sa kadalanan, gibana-bana nga 100 ka mga riders gikan sa nagkalain-laing motorcycle clubs sa probinsiya ang nagtigom niadtong Nobyembre 26 aron pag-obserbar sa World Day of Remembrance for Road Traffic Victims.
Ang delegasyon nga gipangulohan sa Lady Lion Riders Club (LLRC) nagsugod sa usa ka makahuluganon nga pagbiyahe libot sa matahum nga isla sa Camiguin. Sa wala pa ang biyahe, ang mga ppersonahe sa Philippine National Police (PNP) Camiguin ug ang Provincial Disaster Risk Reduction and Management Office (PDRRMO) nakigtambayayong sa pagpahigayon og hingpit nga pagsusi sa mga lisensya ug registration sa tanang partisipante nga mga riders.
Si Rosgen Agnes Borres, presidente sa LLRC, nagpahayag sa pasalig sa club sa pagpasiugda sa kaluwasan sa dalan ug kahibalo. “May this be one of the stepping stones para ma-unite ta tanan mga riders nga mahimo’g good examples to the other riders and be the partners of our government in their call for road safety and awareness, “miingon si Borres.
Ang maong kalihukan nakaani og suporta gikan sa nagkadaiyang ahensya sa gobyerno, apil na ang Land Transportation Office (LTO) sa Camiguin. Marlon Labadan sa Land Transportation Office (LTO) sa Camiguin nihatag og gibug-aton sa kamahinungdanon sa maong okasyon sa pagpasidungog niadtong nahiagom sa mga aksidente sa trapiko.
“It is a profoundly important event to remember a thousand people who have been killed and seriously injured in road accidents and to acknowledge the crucial work of emergency services such as rescue response teams, ambulances, and traffic enforcers for an appropriately strenuous response. We advocate for better support for traffic victims,” ni Labadan.
Sa iyang bahin, si Atanacio Lusdoc, Public Order and Safety Office (POSO) head, nipasiugda sa papel sa pagpugong sa pagsiguro sa kaluwasan sa kadalanan. “Dili man nimo malikayan ang disgrasya pero ma-prevent nato through mag-slow down ta sa dagan, and especially follow the traffic rules and regulations sa ana nga lugar,” gipasiugda ni Lusdoc.
Ang kalihokan nagsilbi nga plataporma alang sa adbokasiya, nagpasiugda sa kamahinungdanon sa responsable nga pagsakay ug pagsunod sa mga lagda sa trapiko aron malikayan ang mga aksidente sa kadalanan. Ang mga partisipante, kauban ang mga ahensya sa gobyerno, misaad nga magtinabangay aron mapalambo ang kultura sa kaluwasan sa mga dalan sa Camiguin. (RTP/PIA-10/Camiguin)
Mokabat sa 100 ka mga riders sa Camiguin ang misugod sa usa ka makahuluganon nga biyahe libot sa maanindot nga isla sa Camiguin aron sa pag-obserbar sa World Day of Remembrance for Road Traffic Victims niadtong Nobyembre 26, 2023. (JME/PIA-10/Camiguin)
