LIGAN CITY (PIA) — Kapin 117 ka magtiayon ang gikasal pinaagi sa “Kasalan ng Bayan” nga gipahigayon isip pagsaulog sa Valentine’s Day ug sa ika-35 nga Civil Registration Month.
Gipangunahan kini sa City Civil Registrar’s Office aron matabangan ang mga magtiayon nga dugay nang nag-ipon apan wala pa nakapakasal tungod sa kakulang sa pinansyal.
“Kani siya gihatag nato nga programa para sa couples nga dugay nga nag-ipon pero lagi wala silay kwarta, considering naay financial problem sila, di sila kasal. So gihatag nato ang higayon nga libre na sila ikasal; ilang mga bata man gud dugay na nag-ipon ang status sa bata illegitimate,” sumala ni City Civil Registrar Lawyer Yussif Don Justin E. Martil.
Mapasalamaton ang mga gikasal human sa 31 ka tuig nga pagpuyo isip magtiayon, si Ivy Aguilar Bajade ug Cyril Bajade sa kataposan nakapakasal pinaagi sa Kasalan ng Bayan.
“Gapasalamat jud ko nga naay Kasalan ng Bayan. Kung wala ni dili mi ma-offical nga mahimong couple. Pasalamat mi nga naay nag-sponsor ani. Wala jud mi gasto,” sumala ni Ivy Bajade.
Nagpabiling lig-on ang ilang gugma bisan sa mga hagit sa kinabuhi, sama sa pagpadako sa ilang upat ka anak pinaagi sa pagbaligya og isda.
“Tip nako sa magtiayon para magdugay gyud, honesty gyud ug sentro sa Ginoo, kana usa nga mag lig-on jud mo,” sumala ni Cyril Bajade.
Samtang, malipayon sab si Lisa ug Romano So-ong kay nakasal na sila human sa lima ka tuig nga panag-uban.
“Sangko sa langit akong kalipay nga natuman na among pangarap. Wala mi ga-expect nga kami jud makadayon,” sumala ni Romano So-ong.
Daghang mga sponsors ang mihatag sab sa ilang suporta. Ang PAG-IBIG Fund ang naghatag sa mga singsing, ang MSU-IIT National Multi-Purpose Cooperative nagpa-raffle og TV ug washing machine, samtang ang Red Ribbon naghatag og mga cake. Ang Grab Iligan, Eagles Club, ug mga konsehal sa siyudad mihatag usab og mga regalo sa bag-ong kasal. (LELA/PIA-10/Lanao del Norte)
