CAMIGUIN (PIA) — Uban ang 127 ka mga partisipante nga gikan sa lokal ug internasyonal nga mga lugar, ang lokal nga kagamhanan sa Mambajao mipahigayon sa Swimjunkie Challenge, Mayo 4, nga misangpot sa kalampusan sa turismo ug mas aktibong partisipasyon sa lokal nga komunidad sa lalawigan.
Matud ni LGU Mambajao Sports Coordinator Gilbert Grado, “Kini nga aktibidades gitambayayongan gyud sa komunidad ever since nagsugod atong mga sports tourism event.”
Sa ikatulong tuig sa pagpadagan niini, ang Swimjunkie Challenge misidlak isip usa sa mga ginapanghambog sa sports tourism sa Camiguin. Kini nga kalihokan gisuportahan sa provincial government sa Camiguin, Philippine Coast Guard (PCG), ug sa lokal nga kagamhanan sa Sagay.
Gipasiugdahan sa kalihokan ang tulo ka kategoriya nga naglangkob sa nagkalain-laing destinasyon sa isla. Ang 2 kilometro nga ruta milungtad sa black sand beach, samtang ang 5 kilometro nga lumba miagi sa White Island. Ang 8 kilometro nga lumba mikalakip sa halos tanang dapit sa tubig sa Mambajao.
Tungod sa risgo sa open water sports, gisiguro ni Grado nga ang kahilwasan sa mga lumalangoy ilang gihimong prayoridad. Giandam nila ang klarong ruta, gitudlo ang mga estasyon, ug gipuwesto ang mga responder sama sa PCG ug mga boluntaryong healthcare workers aron mahatagan og tabang ang mga partisipante sa tibuok kalihokan.
Sa iyang kasinatian isip lumalangoy karong tuiga, gipahayag ni Loneco Ebdalin Pacudan nga, “My swim junkie life is the best! Meeting incredible open water swimmers from different countries has been such a rewarding experience. So grateful for these new friendships forged in the water.”
Si Pacudan nakatapos sa lumba niadtong 2023 sulod sa duha ka oras ug 19 minutos, diin siya nahuman sa ikatulo nga pwesto. Sa 2024, iyang gipauswag ang iyang oras ngadto sa duha ka oras ug 10 minutos ug nakadaug sa ikaduhang pwesto. Karong tuiga, iyang natapos ang lumba sulod lamang sa duha ka oras ug unom ka minutos, nga mao na ang iyang personal best, ug nakab-ot na usab niya ang ikaduhang pwesto sa male category.
Gideklarar sa lokal nga kagamhanan ang mga mananaog human sa lumba, lakip na ang 127 ka partisipante nga miapil sa tulo ka kategoriya.
Sa 8 kilometro nga lumba sa White Island para sa kababayen-an, si Elisabetta Nervi ang nakadaog sa unang pwesto, gisundan ni Rhezel Jugar sa ikaduha, ug si Jo Lynn Teh sa ikatulo. Sa men’s category sa maong distansya, si Prince Sebastian Ragual ang nahimong kampyon, samtang si Loneco Pacudan ang ikaduha, ug si Patrick Scott ang ikatulo.
Sa 5 kilometro nga lumba para sa kalalakin-an, si Lern Pacudan ang mikupot sa unang pwesto, gisundan ni Jeje Pacudan sa ikaduha, ug si Desmond Joy Yap ang ikatulo. Sa kababayen-an nga 5 kilometro nga lumba, si Zita Clarke ang misibya sa unang pwesto, si Bernadette Jacinto ang ikaduha, ug si Vanessa Raymundo ang ikatulo.
Sa 2 kilometro nga Black Beach Swim para sa kababayen-an, si Ruby Tiu ang nakadaog sa unang pwesto, si Mary Louisse Danug sa ikaduha, ug si Yna Paula Gasino, nga adunay kalahi nga 0.5 minutos, ang nakakuha sa ikatulo nga pwesto. Sa lalaki nga kategoriya, si Miguel Lawrence Mahinay ang nakab-ot sa unang pwesto, gisundan ni Wilfred Cutab sa ikaduha, ug si Ran Garner Sabang sa ikatulo.
Gipadayag ni Grado nga dako ang bililhon sa sports events alang sa lalawigan tungod sa ilang kontribusyon sa turismo. “Ang atong tourism sector kanunay gyud gatubo ang ilang mga kita, labi na kung naa ta’y sports tourism event nga gipahigayon nga adunay mga bisita nga muanha gyud sa atong isla,” matod niya.
Gipaabot nga mosaka pa ang interes sa sports tourism sa Camiguin uban ang umaabot nga mga kalihokan sama sa Camiguin Trail Race 2025 karong Hulyo ug ang Enduro Hill sa bulan sa Setyembre. Ang mga turista ug lokal nga gustong moapil sa mga kalihokan sa sports tourism sa isla gidasig nga mosuroy sa opisyal nga Facebook page sa LGU Mambajao Sports. (RTP/HSGA/PIA-10/Camiguin)
