SYUDAD SANG ROXAS, Capiz (PIA) – Ginpahayag sang Philippine Drug Enforcement Agency (PDEA) kag Capiz Police Provincial Office (CPPO) nga may ara na 13 ka banwa sa probinsya sang Capiz ang nakatukod sang ila tagsa ka “Balay Silangan.”
Suno kay PCapt. Merry Cris Dela Cruz, information officer sang CPPO, gina-cater sang Balay Silangan ang mga drug dependents nga nagakinahangalan sang reformation program pagkatapos nila magserbe sa ila penalidad.
Gin-athag man ni Christine Estaca-an, Balay Silangan focal person kag intelligence officers sang PDEA, nga ang mga Balay Silangan ginadumalahan sang tagsa ka local government units (LGUs), samtang ang PDEA bilang implementing arm sang Dangerous Drug Board (DDB), amo ang naga-supervise sang mga Balay Silangan Reformation Center (BSRC).
“Ang pwede lang gid makasulod sa Balay Silangan is ang mga street level nga mga pushers kag ang mga pushers nga na-arrest na and then naka avail na sang PBA or Plea Bargain Agreement,” siling ni Estaca-an, apang kinhangalan nga may court order ukon klaro nga order halin sa huwes nga sila gakinahanglan ipaidalom sang nagakaangay nga intervention o rehabilitasyon sa BSRC.
Gindugang pa niya nga pwede makasulod ang isa ka personalidad kung ang iya category amo ang drug user kag pusher, indi mahimo makasulod kung user lang. Ang mga drug users kag pushers nga mga menor de edad indi man pwede i-rehabilitate sa BSRC.
Suno sa PDEA, ang BSRC isa ka reformation facility nga naga-alagad para sa mga drug pushers kag plea bargainers agud mabuligan sila nga makabalik sa komunidad.
“Ang purpose gid abi sina is mga livelihood programs. Ina may mga government agencies like DTI kag TESDA nga dapat ara gid dira. Kay sila gid dira ang main event, ang goal sang Balay Silangan is tudluan ang mga tawo sang livelihood programs nga legal kag hindi na sila magbalik sa pagbaligya sang ilegal nga droga,” dugang pa ni Estaca-an. (AGP/PLF/PIA Capiz)
