SYUDAD SANG ILOILO (PIA) — Ginpaidalom sang Commission on Elections (COMELEC) sa “areas of concern” ang pila ka mga lugar sa Kabisayaan Nakatungdan para sa 2025 National and Local Elections (NLE).
Sa isa ka press briefing, ginpresentar ni COMELEC Commissioner Aimee Ferolino, nagapamuno man sa Committee on the Ban on Firearms and Security Concerns (CBFSC), ang mga lugar nga nakapaidalom sa areas of concern nga gingrupo sa mga kategorya sang green, yellow, orange, kag red.
Sandig sa COMELEC Resolution No. 11067, ang mga lugar sa idalom sang green category nagakahulugan nga wala sang security concern kag nagapabilin nga hilway kag malibong ang pagpatigayon sang piniliay. Kapin sa 116 ka mga lokalidad sang rehiyon ang nakapaidalom sa ini nga kategorya.
Ang mga lugar sa idalom sang yellow category may pagluntad sang ginasuspetsahan nga election-related incident sa nagligad nga duha ka mga eleksyon, may grabe nga pag-ilinaway sang mga partido, posible nga pagkuha sang mga private armed groups (PAGs) ukon potensyal nga PAGs sang mga kandidato sa lugar, pagluntad sang politically-motivated nga election-related incident sa tion sang karon nga election period, kag ang lugar anay napaidalom sa COMELEC control.
Sa idalom sang ini nga kategorya, may pito ka mga lugar sa rehiyon nga ginabug-os sang Ajuy, Lemery, kag San Dionisio sa probinsya sang Iloilo, Isabela kag San Enrique sa Negros Occidental, President Roxas sa Capiz, kag Tobias Fornier sa Antique.
Apang, may siyam ka mga lokalidad sa rehiyon ang nakapaidalom sa orange category ukon ang mga lugar nga may kombinasyon sang duha ka mga sitwasyon ukon masobra pa sa idalom sang yellow category kag may seryoso nga pamahog sang mga communist terrorist groups ukon iban nga mga grupo na nadeklara sang mga awtoridad.
Lakip diri ang mga banwa sang Badiangan, Janiuay, Leon, Maasin, kag San Joaquin sa Iloilo, Calatrava, Cauayan, kag Sipalay City sa Negros Occidental, kag Tapaz sang Capiz.
Sa idalom sang red category, naga-isahanon ang banwa sang Calinog sa probinsya sang Iloilo sa bug-os nga rehiyon kag isa sa 38 ka mga lokalidad sa bug-os nga pungsod nga nakitaan sang isa ukon madamo nga mga sitwasyon sa idalom sang yellow nga kategorya lakip ang seryoso nga pamahog sang rebelde nga mga grupo nga sa idalom sang orange category, kag ang deklarasyon sang lugar sa idalom sang COMELEC control.
Sa pahayag ni COMELEC Chairperson George Erwin Garcia mahimo nga magbag-o pa ang listahan sang mga lugar nga sa idalom sang areas of concerns apang nagapalapit ang adlaw sang piniliay kag nakasandig sa mangin rekomendasyon sang lokal nga Joint Security Control Centers.
Mahibaloan nga nagsugod sang Enero 12 ang election period para sa magaabot nga piniliay sa Mayo 12 subong nga tuig nga nagapatuman sang gun ban sa bug-os nga pungsod, pagdumili sa mga kandidato sa pagkuha sang mga security personnel, kag iban pa nga mga prohibisyon.
Angot sini, nag-establisar ang Philippine National Police kag iban pa nga law enforcement agencies sang mga COMELEC checkpoints agod nga ipatuman ang mga regulasyon agid masiguro ang malinong kag matawhay nga pagpaabot sang 2025 NLE. (AAL/FRG/PIA6)
