TAGBILARAN CITY, Bohol (PIA) – Labing menos 17 ka mga kalungsuran sa Bohol ang may mga kaso sa dengue nga minglapas na sa ilang threshold nga gikwenta subay sa average sa ilang lima na ka tuig nga mga kaso sa nahisgutang sakit.
Kini maoy gitaho ni Provincial Epidemiology and Surveillance Unit (PESU) head Fritzie Olaguir, didto sa labing bag-o nga tigum sa Provincial Anti-Dengue Task Force, didto sa Capitol, dili pa lamang dugay.
Ang kalungsuran sa Anda, Alicia, Baclayon, Balilihan, Candijay, Dauis, Garcia Hernandez, Getafe, Inabanga, Mabini, Maribojoc, San Isidro, Sikatuna, Tagbilaran City, Talibon, Trinidad, ug Tubigon, may mga natala nga kaso sa pagka-ospital, pagkagrabe ug pagpangamatay subay sa gipakanaug nga basehan sa Department Memorandum No. 2023-0103.
“Tungod usab niini, ang kinatibuk-ang Bohol, mingsulod na sa unom ka semana nga ang kaso sa dengue permi na nga minglapas sa threshold,” dayag ni Olaguir didto sa tigum.
Pinaagi sa usa ka Executive Order No 34, gideklara ni Gov Erico Aristotle Aumentado ang dengue outbreak sa Bohol subay usab sa rekomendasyon sa Department of Health (DOH), ug sa Provincial Health Office (PHO).
Ang Anda pananglitan, sugod sa morbidity week 29 (Hulyo 14-20), wala na moubos sa 10 ka kaso sa dengue ang namatikdan sa mga barangay sa lungsod, ug labing taas ang sa duha ka semana nga minglabay kanus-a may 25 ka tawo ang na-igo sa sakit.
Ang Alicia, may pito na ka semana nga nag-hatag kaguol ang dengue sugod sa unang semana sa Hulyo ug hangtud pa karon.
Unom na usab ka semana naghambin ang Baclayon sa hulga sa dengue sugod sa ikatulong semana sa Hulyo, kanus-a sa usa ka semana, mingabut sa 14 ang ilang dengue patients.
Ang Candijay, gikan sa morbidity week 28 (ukaduhang semana sa Hulyo), wala pa mo-ubos sa 10 ang ilang kaso matag semana.
Ang Dauis, sukad sa ila 29 nga morbidity week o tunga-tunga sa Hulyo, gikan sa unom ka kaso matag semana, mi-sulbong pa sa 16 ka kaso matag semana niadtong usa ka semana.
Walo na usab ka semana nga sunod nga ang Garcia Hernandez may kapin sa upat ka kaso sa dengue, labing taas niini, napulo sa usa ka semana.
Sa kaso sa Getafe, sukad pagsugod sa Hulyo, nagpadayon pagsaka, hangtud nga nakaabut sila og 25 ka pasyente nga na dengue, duha na ka semana ang minglabay.
Sa Inabanga, sukad pa sa Enero sila nga may tag-as nga kaso sa dengue, nga may gikan sa 25 matag semana, ngadto sa labing taas nga 40 ka kaso sa usa ka semana.
Sa Mabini, sukad pa sa Pebrero silang nabalisa sa dengue, hangtud nga minglanat nag siyam ka semana, labing taas nga 25 ka pasyente, duha ka semana ang minglabay.
Sulod sa upat ka labing bag-o nga semana, ang Maribojoc, may 4 ra ka semana, nga anaa silay labing menos 8 ka kaso sa dengue.
Upat na usab ka semana nga may tag 2 ka kaso sa dengue dinhi, samtang 6 na usab ka semana nga may dengue ang Sikatuna, paubos mna hinuon ang iyang mga kaso.
Sa Tagbilaran City gikan sa ika duhang semana sa Hulyo, wala pa mapaubos sa 23 ka kaso sa dengue nga gihatud sa mga RHU ug hospital.
Lima na usab ka sunod sunod nga pagkasakit sa mga taga Tubigon, sugod sa week 30 (ikatulong semana sa Hulyo) apan may patay usab sila.
Sa Trinidad, gikan sa week 28 o tungatunga sa Hulyo, 6 ka la semana silang nagbilar sa pagpanalipud sa sakit. (RAHC/PIA Bohol)
