SYUDAD SANG ILOILO (PIA) — Isa ka graduation ceremony ang ginpatigayon sa Iloilo City para sa 175 ka trainees sa nagkalainlain nga kwalipikasyon sang Technical Education and Skills Development Authority (TESDA) 6 bilang pagkumpleto sang ila tagsa ka programa.
Paagi sa Regional Training Center-Iloilo, ginpakita sang aktibidad ang mabuhat sang Technical Vocational Education and Training (TVET), kon sa diin ang seremonya may tema nga “Empowering Skills, Transforming Futures: Embracing the Power of TVET.” Ini nagapakita sang pangako sang ahensya nga tudluan ang mga indibidwal sang mga skills nga ila kinahanglan para mangin madinalag-on sa ulubrahan.
Nakabaton ang mga trainees sang ila Certificates of Training matapos makumpleto ang programa sa nagkalainlain nga field kaangay sang Trainer’s Methodology Level I, Shielded Metal Arc Welding NC I and NC II, Electrical Installation and Maintenance NC II, Carpentry NC II and III, Masonry NC II, kag Driving NC II.
Ginhatagan pagtamod ang TVET ni TESDA 6 Regional Director Ramon Evan T. Ruiz kon sa diin iya gindayaw ang tanan nga trainers bangud sa ila dedikasyon kag pasensya para matudluan kag mapasangkad ang ihibalo sang mga graduates.
Gindayaw man ni Ruiz ang mga nag-gradwar nga nagpakita sang ila pagpaningkasog para malampuwasan ang paghanas.
Gin-feature man ang inspirational message gikan kay Jeremiah John P. Vardeleon, presidente sang Iloilo Paraw Resort, nga nakigbahin sang iya ihibalo tuhoy sa importansya sang husto nga paghanas kag mga talamdan sa paglab-ot sang kadalag-an.
Iya man ginpunto ang papel sang TVET para mahatagan ang mga indibidwal sang nagaka-igo nga kinaadman agud makatupong sa “competitive job market.”
Gindayaw man ni Vardeleon ang dedikasyon sang mga graduates sa pagtuon sang bag-o nga skills. (AAL/AGP/ PIA 6 kalakip ang mga balita gikan sa TESDA 6)
