Mga pamilya nga nagtapos bilang benepisyaryo ka 4Ps nagtambong kang andang gradwasyon kaimaw ang mga opisyales kang banwa kag DSWD. (Laragway:DSWD)
SAN JOSE, Antique (PIA) — Sa pagtapos kang tuig 2024, ang opisina kang Department of Social Welfare and Development nagreport ka paggradwar ka 1,770 ka mga imol nga pamilya sa Pantawid Pamilyang Pilipino Program (4Ps).
Si DSWD Provincial Link Jeffrey G. Gabucay nagkalipay sa amo nga balita kag nagpasalamat sa mga pamilya nga nagpaninguha agud mabag-o ang andang kabuhi kag mabayaan ang kaimulon.
Kang ginhiwat ang ANI ukon 4Ps Kilos-Unlad Graduation kang Disyembre kang nagligad nga tuig, ang dyang mga pamilya nagsaka sa entablado bilang pagkilala kang anda gradwasyon halin sa Pantawid Pamilya beneficiaries.
Suno kay DSWD-4Ps Social Welfare Officer Mell Joy P. Braga, ang ANI sangka tuigan nga hirikuton sa pagkilala kang mga pamilya nga nagtapos run bilang benepisyaryo kang 4Ps tungod nga nagmayad run ang estado kang andang kabuhi ukon wara run sanda ti kabataan nga kwalipikado sa amo nga programa.
Ang dya nga mga pamilya ginturn-over sa mga nga lokal nga pamunuan para sa tayuyon nga pagsuporta kag monitor agud sanda indi run magbalik sa nauna nanda nga estado kang kaimulon.
Sa kabilogan nga 1,770 nga nagtapos sa 4Ps, 1,072 ang mga pamilya nga nagmayad run ang andang pangabuhi kag 698 ang mga pamilya nga wara run ti kabataan nga kwalipikado sa programa.
Ang DSWD nagpasalamat sa mga ahensya kang gobyerno, lokal nga pamunuan sa barangay,banwa, kag probinsya kag mga pribado nga organisasyon nga anda nangin katimbang sa dya nga programa. (AGP/PSM/ PIA-Antique/ DSWD-4Ps)
