SYUDAD SANG ILOILO (PIA) — May kabug-usan nga 178 scholarship applicants ang gin-akomodar para sa Fisheries Scholarship Program National Qualifying Examination (FSP-NQE) sang Bureau of Fisheries and Aquatic Resources (BFAR) nga ginpatigayon sang damlag lang.
Ang mga nagahandum nga mangin “Iskolar ng BFAR” ang naghalin sa nagkalainlain nga probinsya kag sila gin-akomodar sa mga testing centers sa New Washington, Aklan; San Jose de Buenavista, Antique; Roxas City, Capiz; Jordan, Guimaras; Iloilo City; kag Talisay City, Negros Occidental.
Ang mga estudyante nag-apply sa nanari-sari nga scholarship categories kaangay sang Fisherfolk Children Education Grant (FCEG), Fisheries Industry Leaders Grant (FILG), kag Indigenous Cultural Communities/Indigenous Peoples (ICCs/IPs) scholarship program.
Sa Aklan, ang Provincial Fisheries and Aquatic Resources Training Development and Product Center nagbaton sang mga aplikante llakip ang 16 ka estudyante para sa FCEG, 1 para sa FILG, kag 5 sa idalom sang ICC/IPs nga mga kategorya.
Sa Antique naman, ang Antique National School ang nag-akomodar sang 13 ka FCEG applicants, 10 FILG candidates, kag 4 ICC/IPs nga mga estudyante.
Sa Capiz, ang Provincial Agriculture Office nagbaton naman sang 11 ka FCEG kag 4 FILG examinees.
Ang Guimaras State University sa Jordan nag-akomodar naman sang 30 ka FCEG applicants kag 5 ka para sa FILG.
Sa Iloilo City, ang BFAR 6 Building sa PFDA Complex nagbaton ka 21 FCEG applicants, 19 para sa FILG, kag 5 sa idalom sang ICC/IPs nga kategorya.
Sa pinakaulihi, ang Negros Occidental, Carlos Hilado Memorial State University sa Talisay City nag-akomodar sang 19 ka FCEG applicants kag 15 nga para sa FILG.
Ang eksaminasyon, nga nagsugod sang alas-8 sa aga, dululungan nga ginhiwat sa mga nasambit nga regional testing centers.
Sa pagtakop sang selection process, tatlo ka mga estudyante ang pagapilion para sa FILG category, 20 sa FCEG, kag tatlo naman para sa ICCs/IPs nga mga kategorya. Ang ini nga mga scholarship nagahatag sang oportunidad sa mga kabataan para padayunon ang ila edukasyon agud sila makaamot sa pagpasangkad sang sektor sang pangisdaan. (AAL/AGP/PIA 6 kalakip ang mga balita halin sa BFAR 6)
