SYUDAD SANG ILOILO (PIA) – Madinalag-on nga nakapatigayon ang Philippine Drug Enforcement Agency (PDEA) sang 183 ka operasyon kontra ilegal nga droga sa syudad sang Iloilo humalin sang Enero 1 tubtob Hunyo 7, 2024.
Sa ginhiwat nga ika-duwa nga regular joint-meeting sang Iloilo City Peace and Order Council (ICPOC) kag Anti-Drug Abuse Council (ADAC) sang Hunyo 13, ginpahayag ni Rodante Santiago, information officer sang PDEA-Iloilo nga ara sa 16,469.873 ka gramo sang shabu ang ila nakuha sa ginhiwat nga mga operasyon.
Ginpahayag pa ni Santiago nga ara na sa 94 ka mga barangay sa syudad ang makabig nga “drug-cleared”, samtang 86 ka mga barangay pa ukon 47.22 percent ang may ara pa sang presensya sang ilegal nga droga.
Dugang pa sini nga nagahiwat sila sang mga tikang, parehas sang demand reduction kag interdiction, upod ang iban pa nga katapo sang law enforcement agencies, para malikawan ang paglapta sang ilegal nga droga sa syudad.
Suno kay Santiago, kinahanglan man nga matukod na ang Balay Silangan Reformatory Center sa syudad kag ang mas maayo nga koordinasyon sa tunga sang BADAC kag sang law enforcement agencies agud nga mas mapabaskog pa ang Barangay Drug Clearing Program.
Ginkilala man sini ang importansya sang paghatag sa drug law enforcers sang dugang nga kinaalam sa mga layi natuhoy sa drug trafficking kag seizure protocols para masiguro ang legal nga proseso sa tunga sang kampanya kontra ilegal nga droga; kag ang pagpabaskog sang demand reduction program pinaagi sa pagpalapnag sang mga impormasyon kag paghiwat sang advocacy campaigns. (AAL/JNH/PIA Iloilo)
