SYUDAD SANG ROXAS, Capiz (PIA) — Kapin sa 186,000 ka mga estudyante sa elementarya kag sekondarya nga mga eskwelahan sa probinsya ang nagbalik eskwela para sa “face-to-face” nga klase para sa school year 2024-2025 humalin sadtong Hulyo 29.
Ang nasambit nga numero ang ginabug-usan sang kapin 145,000 ka mga bumulutho nga sakop sang Department of Education (DepEd) Capiz Schools Division kag 41,000 naman sa DepEd – Roxas City Schools Division.
Ginpahayag ni Dr. Miguel Mac Aposin nga Schools Division Superintendent sang DepEd- Capiz nga nakahanda ang tanan nga eskwelahan sa idalum sang DepEd – Capiz para sa “full face-to-face” nga klase, apang iya man gindugang nga preparado man ang mga eskwelahan kag manunudlo nga magpatigayon sang distance learning pinaagi sa mga modyul kon kinahanglanon.
Sa iya nga bahin, ginpahayag man ni Dr. Roel Bermejo nga Schools Division Superintendent sang DepEd-Roxas City nga nakahanda man ang mga eskwelahan sa syudad sa “in-person” nga klase.
Ang mga klase karon nga school year ang magatapos sa Abril 15, 2025 base sa DepEd Order No. 9 nga nagtalana sang Implementing Guidelines On The School Calendar and Activities for the School Year 2024 – 2025. (AGP/AAL/PIA Capiz)
