Photo by PCO
SAN JOSE, Antique (PIA) — May kabilogan nga 1,932 Agrarian Reform Beneficiaries ukon ARBs sa Panay kag Guimaras ang nakabaton kang titulo ka anda lupa kasan-o gid lamang sa syudad kang Passi, Iloilo.
Si President Ferdinand “Bongbong” Marcos Jr. gid mismo ang nagpanagtag kang 2,588 ka mga titulo sa nasambit nga ARBs.
Sa amo nga okasyon, naghambal ang Presidente nga padayunon na ang pagsuporta sa sektor kang agrikultura.
Ana ginhambal nga masobra 2,500 ang mga titulo nga ana ginpanagtag ugaring mas importate ang pagbag-o kang kabuhi kang haros 2,000 ka mangunguma nga nagtanum kang anda handum sa amo nga lupa kag kadya, ginapang-iyahan run nanda.
Gindugang hambal ka Presidente nga ang kada titulo nagarepresentar kang kahilwayan kang kada mangunguma kag kasiguruhan kang mayad nga paraabuton kang anda pamilya.
Si Rolando Palma Ladigohon, sangka ARB halin sa Barangay Maasin, Passi City, nagpasalamat sa presidente kag kay Secretary Conrado Estrella III sa pagtao kang titulo nga buhay run nanda ginahandum.
Ang dya nga titulo kabahin kang programa kang Department of Agrarian Reform Comprehensive Agrarian Reform Program (CARP)- Support to Parcelization of Lands for Individual Titling (SPLIT) Project nga nagapatigayon nga matituluhan ang mga lupa kang ARBs.
Si DAR undersecretary Jesry Palmares nagdugang hambal nga ang DAR padayun nga magapatigayon nga mabaton kang mangunguma ang titulo nga anda ginahandum.
Pero ginpangabay kang DAR sa kada mangunguma nga anda himuon ang anda masarangan para mangin mapuslanun ang anda lupa kag pwede pa nanda ipanubli sa masunod nga henerasyon. (AGP/PSM/PIA-Antique)
