SYUDAD SANG ROXAS, Capiz (PIA) — Duha sa pito ka mga bag-o nga police station sa rehiyon ang padayon nga ginatukod sa banwa sang Panitan kag Dumarao sa probinsya sang Capiz.
Ang tatlo ka panalgan nga edipisyo ang ginatukod man para sa Bago City Component Police Station sa Bago City; Himamaylan Component City Police Station sa Himamaylan City; Isabela Municipal Police Station sa banwa sang Isabela; kag Manapla MPS sa banwa sang Manapla nga lunsay sa probinsya sang Negros Occidental.
Dugang pa, nagapadayon man ang pagtukod sang bag-o nga MPS para sa banwa sang Sebaste sa probinsya sang Antique.
Ang nasambit nga mga proyekto ang kabahin sang mga administrative accomplishment sang Police Regional Office 6 nga gin-presenta sa Agosto 6 nga episode sang Kapihan sa Bagong Pilipinas sang Philippine Information Agency 6.
Ginpahayag ni Brig. Gen. Jack L. Wanky nga direktor sang PRO 6 nga ginapasalig sang kapulisan ang pagpabilin sang kalinong kag katawhay sa rehiyon sa suporta sang mga pumuluyo agud nga labi pa nga mapadayon ang pagsanyog kag progreso.
Kalakip man sa mga administrative accomplishments sang PRO 6 ang gin-inagurahan nga bag-o sini nga Multi-Purpose Building, pagsaylo sang Iloilo Police Provincial Office sa bag-o nga headquarters sa Brgy. Sablogon, Passi City sa Iloilo kag activation sang apat ka dugang nga police stations sa idalum sang Iloilo City Police Office.
“Ini ang mangin simbolo sang puluy-an sang isa ka pamilya nga magadala sang pagpaluntad sang katawhayan sa banwa sang Dumarao,” ang pahayag ni Atty. Mateo Hachuela nga alkalde sang Dumarao sa ginatukod nga PNP building.
Sa iya nga bahin, ginpahayag ni Maj. Amie Bulaqueña nga hepe sang Panitan MPS nga ginalauman ang pagbendisyon kag inagurasyon sa bag-o nga police station antes matapos ang tuig bangud madali na matapos ang konstruksyon sang edipisyo. (AGP/AAL/PIA Capiz/mga litrato halin sa Dumarao MPS kag Panitan MPS)
