SYUDAD SANG ILOILO (PIA) — Sa katuyuan nga masabat ang nagkalainlain nga mga paghangkat dulot sang climate change sa mga industrya sang kape, cacao, kag niyog, ang “CoCaNut Congress” 2024 naghatag oportunidad sa mga stakeholders para maistoryahan ang mga estratehiya para sa pagpadayon sang produksyon sang mga nasambit nga pananom.
Ang ini nga aktibidad gin-organisa sang POPA Agriculture Cooperative nga ginpatigayon humalin Nobyembre 6 tubtob 8 sa Iloilo Convention Center.
Ang aktibidad may tema nga “Resilient and Sustainable Agriculture in Changing Climates” nga ginpasakupan sang masobra 400 ka mga mangunguma, ahensya sang gobyerno, agripreneurs, kag industry leaders gikan sa bug-os nga pungsod para pagasabton ang nagabag-o nga mga kinahanglanon sang sektor.
Naghatag ang plenary sessions sang mapuslanon nga mga panan-awan sa pag-adapt sang farming practices sa mga epekto sang climate change, samtang ang trade fair kag exhibits naman nagpakita sang mga makabag-o nga mga produkto kag teknolohiya nga nagatuyo sa pagpauswag sang mga buhat sa agrikultura.
Si Department of Agriculture (DA) Undersecretary para sa High-Value Crops nga si Cheryl Marie Natividad-Caballero nagpabutyag sang iya suporta sa aktibidad kag nagpaabot sang mensahe bilang tal-os kay DA Secretary Francisco P. Tiu Laurel, Jr.
Iya ginhambal ang nagkalainlain nga mga paghangkat nga ginakaatubang sang mga lokal nga mangunguma dulot sang climate change kag iban pa nga mga problema sa sektor. Iya man ginhatagan pat-od ang pangako sang DA nga sabton ang ini nga mga isyu pamaagi sa mga inisyatibo nga nagahatag praktikal kag “high-impact” nga suporta sa mga mangunguma.
Ginhambal man ni Usec. Caballero sa mga nagtambong nga tamdon ang ini nga pamulong-pulong bilang isa ka kahigayunan sa pagpabakod sang partnerships sa sektor sang agrikultura kag kolektibo nga kadalag-an.
“We aim to build a resilient, adaptive agriculture sector for our coffee, cacao, and coconut industries, our high-value commercial crops,” suno kay Caballero.
Malaumon man siya nga ang kahiwatan magahatag inspirasyon sa mga kolaborasyon para mabuligan ang mga mangunguma nga malampuwasan ang mga paghangkat.
Samtang, si DA-WV Regional Executive Director Dennis Arpia nagpabutyag sang iya pagpasalamat sa mga nag-organisa sang pamulong-pulong, ilabi na sa POPA sa pagtipon sang key players sa sektor sang agrikultura. Ginhatagan niya sing importansya ang pangako sang DA nga labaw pa sa pagpresenta sang mga programa, ini magasiguro sang aktibo nga partisipasyon nga magadul-ong sang matuod nga mga solusyon.
Nagpasalamat man si Arpia sa mga mangunguma, investors, mga organisasyon, kag lokal nga mga pangulohan nga nagtambong.
Dugang pa niya, ang aktibidad wala lamang nagahatag kahigayunan para mapakita ang mga kadalag-an pero nagahatag man sang lugar para mapakigbahin ang mga eksperyensya kag ideya sa pag-ayo.
Ginhatagan pagtamod ni Arpia ang importansya sang nagapadayon nga pagpakig-upod sa mga LGU agud masiguro nga ang ihibalo nga nakuha gikan sa amo nga mga kahiwatan magamit sa mga paagi nga direkta nga makabenepisyo sa komunidad sang mga mangunguma.
Iya ginpasiguro nga ang DA magapadayon nga mangita sang inobasyon sa pagpauswag sang mga buhat sa agrikultura kag maghatag sang mga nagakaigo nga bulig para sa mga mangunguma.
“Ang farmers po kahit kailan hindi po natin iiwan,” siling ni Arpia.
Suno sa DA, paagi sa kolaborasyon, pagpakigbahin sang mga ihibalo, kag inobasyon, ang CoCanut Congress 2024 nagserbe nga paagi para sa mas mabaskog kag mas mabinungahon nga pagpanguma sa industriya sang kape, cacao, kag niyog. (AAL/AGP/PIA 6 kalakip ang mga balita halin sa DA Western Visayas)
