SAN JOSE, Antique (PIA) — Nagapadayon sa dya nga probinsya ang 2024 Community Based Monitoring System (CBMS) kag Census of Population and Housing (PopCen) kang Philippine Statistics Authority (PSA).
Sa sangka programa sa radyo, gin-agda ni PSA Antique Supervising Statistical Specialist Rodme Febreo ang mga Antiqueño nga suportahan ang lihok paagi sa pagtugro kang matuod nga sabat kag impormasyon sa Census.
Hambal ni Febreo, bahul ang importansya kang 2024 CBMS kag PopCen kay dya nagakolekta kag proseso kang datos halin sa mga komunidad nga sarang magamit bilang basehan sa pagbalay kang mga polisiya kag pagbuhat kang mga programa kang gobyerno.
Dugang na pa, importante man ang Census indi lang sa pag-isip kang populasyon kang pungsod kundi pati man sa pagtugro kang bahin kang mga local government unit (LGU) sa National Tax Allocation (NTA).
Sa bahin kang CBMS, ang mga datos nga ginatipon may kaangtanan sa migration, ikaayong lawas, water sanitation kag hygiene, panglantaw sa kalinong kag katawhay sa komunidad, kag iban pa.
Ang dya nga mga datos makabulig sa gobyerno sa pagpatigayon kang social protection programs.
Ginsiguro man kang PSA nga indi malipatan sa 2024 CBMS kag Population Census ang mga Antiqueño sa mga marayo nga barangay. (AGP/BPS/PIA Antique)
