CAMIGUIN (PIA) — Ang probinsya sa Camiguin maoy nag-host sa State Colleges and Universities Athletic Association (SCUAA) National Games 2025, nga pormal nga gibuksan, Abril 23, ug gitigom ang kapin sa 7,500 ka mga atleta ug coaches gikan sa nagkalain-laing state universities and colleges (SUCs) sa tibuok nasod.
“We are here not only to compete but also to connect. To celebrate the strength of our youth, the power of unity, and the enduring spirit of nation,” matod pa ni Gob. Xavier Jesus Romualdo sa iyang welcome speech atol sa opening ceremony.
(Nia kita dinhi dili lang para makigkompetensya, kundili para magkahiusa. Aron isaulog ang kusog sa atong kabatan-onan, ang gahom sa panaghiusa, ug ang malungtaron nga espiritu sa nasud.)
Ang usa ka semana nga kalihokan naglakip sa nagkalain-laing dula sama sa basketball, volleyball, swimming, ug uban pa. Mitambong sa seremonya sila Rep. Jurdin Jesus Romualdo, Gob. Romualdo, mga mayor sa munisipyo, ug mga presidente sa partisipante nga SUCs.
“Gilauman usab nga kini nga kalihokan makahatag ug dako nga benepisyo sa lokal nga turismo ug ekonomiya, tungod sa pagdagsa sa mga bisita ug suporta sa komunidad,” matod pa ni Gob. Romualdo.
Sa iyang bahin, si Dr. Tirso A. Ronquillo, presidente sa Philippine Association of State Universities and Colleges (PASUC), mipasabot sa importansya sa SCUAA 2025 isip una nga national event human sa pandemya nga naglakip sa kompleto nga mga sports events, lakip na ang combative sports.
“Last time, I think it was two years ago in 2023; it was our first after the pandemic when we had it in Tarlac. We had limited sports events. And now we’ve completed all of them, including the combative sports and everything. So it’s exciting now,” matud ni Ronquillo atol sa panaghisgot.
(Sa miaging duha ka tuig, sa 2023, didto sa Tarlac, limitado ra atong mga sports events. Karon, kompleto na tanan, apil na ang combative sports. Mao nga makapadasig gyud karon.)
Gipasidunggan niya ang panaghiusa ug paningkamot sa mga sports directors sa mga SUCs nga mipasiugda sa kompleto nga line-up sa 2025. “They are very aggressive to push all the events to be conducted this time in 2025,” dugang niya.
(Sila gyud ang agresibo nga mapasugod ang tanang dula karong tuiga.)
Kasinatian sa Camiguin
Gipadayag sa mga partisipante ang ilang pasalamat sa mainitong pagdawat ug maayong pagpangandam sa lokal nga panggamhanan ug mga organisador.
“Ang officials diri grabe mu-support then ang pinaka the best dinhi kay ang tubig, dili maglisod kay sa mga ubang area gud, ang tubig ang pinakaproblema. Pero karon okay ang tubig,” ingon ni Heydier Tediaros Lamaon, player gikan sa Davao Oriental State University.
Nagpasalamat usab siya sa mga boluntaryo ug opisyal sa ilang suporta.
“Sa mga nag-atiman sa amo diri sa SK officials ug sa mga teacher diri, thank you kaayo kay nagpahiram mo og foam, naghatag mo og karton then everyday nagapangutana mo sa amoa unsa pa’y mga needs namo sa room,” dugang niya.
Si Ham Basan, player gikan sa Bayugan, Agusan del Sur, mipadayag usab sa iyang positibong kasinatian sa probinsya.
“Nindot gyud siya para sa akoa ang pagtagad sa mga tao dili pareho sa uban nga strict ilang pagtagad. Diria kay murag friendly sila then ang ilang lugar is daghan tourist spot,” sulti niya.
Giduso ni Basan ang walay puas nga suporta gikan sa ilang fans. “Support lang mo, buhaton namo ang tanan nga mudaog mi. We win as a team and we play as one,” iyang panapos.
Ang SCUAA National Games 2025 magpadayon sulod sa usa ka semana, ug ang mga dula ipahigayon sa nagkalain-laing venues sa Camiguin. Ang mga organisador ug lokal nga opisyal padayon nga nag-monitor ug naghatag og tabang sa mga delegado aron masiguro ang malinawon ug malampuson nga kalihokan. (RTP/PIA-10/Camiguin)
