Yari ang mga emergency hotlines sang gobyerno probinsyal nga mahimo nga matawgan agud mahatagan sang bulig sa mga Ilonggo nga OFWs sa Lebanon. (Photo by: Iloilo Province)
SYUDAD SANG ILOILO (PIA) — Nangin aktibo sa karon ang 24/7 emergency hotlines sang gobyerno probinsyal agud mabuligan ang Ilonggo nga mga Overseas Filipino Workers (OFWs) nga yara sa karon sa Lebanon kun sa diin may nagapadayon nga inaway sa rehiyon.
Ang ini nga inisyatibo ang kabahin sang Task Force ‘Bulig Ilonggo’ nga serbisyo nga napaidalom sa Executive Order 004 series of 2020, nga nagtuga sang suporta sa mga OFWs kag ila sini nga mga pamilya sa mga lugar nga madali mabiktima sang inaway.
Suno sa gobyerno probinsyal, mahimo nga magamit ang hotline sa pagpangabay sang repatriation kag pag-trace sang kahimtangan sang mga apektado nga mga indibidwal.
Ginabanta sa 1,000 nga mga documented OFWs nagikan sa Iloilo ang yara sa Lebanon kag mahimo nga madugangan pa ang lista sang iban nga wala madokomento nga mga migrante.
Ginahulag man sang Provincial Public Employment Service Office (PESO) kag Provincial Risk Reduction and Management Office (PDRRMO) ang tagsa ka municipal kag barangay networks agud makilala kag ma-trace ang mga OFWs.
Ginmando man ni Gov. Arthur Defensor, Jr. ang koordinasyon sang mga kabanwahanan kag barangay agud mapadasig ang proseso sang pagkilala sang mga OFWs.
Yara na sa Alert Level 3 ang sitwasyon sa Lebanon kag ini ang nagatugot sa mga Pilipino sa boluntaryo nga pagpauli.
Ang rehiyon sa karon padayon nga apektado tungod sa away sa tunga sang Israel kag militante nga grupo sang Lebanon nga Hezbollah. (AAL/LMLE/PIA Iloilo)
