SYUDAD SANG ROXAS, Capiz (PIA) – Nagpatigayon sang apat ka adlaw nga libre nga operasyon ang Advance Craniofacial Project Philippines Inc. (ACPPI) para sa mga pasyente nga may ara cleft lip and cleft palate sa Camp Peralta Station Hospital (CPHS), 3rd Infantry (Spearhead) Division sa banwa sang Jamindan sang Oktubre 1 tubtob 4.
Ang amo nga aktibidad ang nakabulig sa 24 ka mga pasyente, kalakip na diri ang 21 nga halin sa Capiz, duwa nga naghalin sa Iloilo, kag isa ang naghalin sa Aklan.
Ang ACPPI isa ka charitable organization nga nagabulig sa mga kubos nga pasyente, bata man ukon tigulang pamaagi sa paghatag sang libre nga operasyon para sa cleft lip and cleft palate.
Ginhiwat man ang pareho nga inisyatibo sa iban pa nga mga unit lakip na diri ang 3rd Civil-Military Operations Battalion, kag 61st Infantry Battalion.
Nagpahayag man sang iya pagpasalamat si Ma. Grita Magbanua, lola sang isa ka pasyente nga nakabaton sang libre nga operation.
“Nagapasalamat gid ako sa Operation Smile nga nakabulig sa amon, kag subong man sa Philippine Army nga nagbulig man sa amun nga matigayon ang pag opera sang akun apo kag makakadlaw man nga gwapa. Madamo gid nga salamat,” suno kay Magbanua.
Suno sa 3ID, ang amo nga aktibidad ang naghatag sang pagtalupangod sa kolaborasyon sang Civil Society Organizations (CSOs) kag National Government Organizations (NGOs) nga nagatuyo nga mapabaskog ang pagpaabot sang bulig nga may kaangtanan sa isyu sa ikaayong lawas kapareho sang cleft lip and cleft palate deformities sa mga pumuluyo nga kubos.
“We are deeply grateful to the ACPPI for their unwavering commitment to transforming lives through free surgical interventions. This initiative aligns with our mission to serve and uplift the well-being of the communities in our area of responsibility. We are proud to be part of this meaningful cause, and we look forward to future collaborations that will bring hope and healing to more individuals,” pahayag ni MGen. Marion R. Sison, Commander sang 3ID.
Ang nasambit nga aktibidad amo ang ikaduha nga kolaborasyon sang ACPPI kag CPSH.
Sang nagligad nga Abril 17 tubtub 20, 2024, madinalag-on nga nakabaton ang 42 ka mga pasyente nga naghalin sa nagkalain lain nga banwa sang probinsya sang libre nga operasyon kag ginsundan sang pagpirma sang Memorandum of Agreement (MOA) sa tunga sang duwa ka mga institusyon. (AGP/PLF/PIA Capiz)
