SYUDAD SANG ILOILO (PIA) — Kapin 244 ka mga mangunguma sang mais halin sa mga kabanwahanan sang Batad, San Rafael, San Dionisio, kag Barotac Viejo sa Iloilo ang naggradwar sa School-on-Air (SOA) program para sa sustainable corn farming practices sang Department of Agriculture (DA) Western Visayas.
Ginpatigayon ang graduation ceremony sa Barotac Viejo Covered Gym sang Nobyembre 8, 2024, kon sa diin ang mga graduates nagselebrar sang ila bag-o nga mga ideya, teknikal nga ikasarang, kag mas pinaayo nga panan-awan sa pagpanguma.
Sa isa ka bulan nga kurso, ang DA Western Visayas, paagi sa Regional Agriculture and Fisheries Information Section (RAFIS), nagdihon sang kurikulum nga santo sa pagsabat sang mga isyu sa pagprodukto sang mais nga nakasentro sa pest and disease management.
Ang ini nga kahiwatan nagasuporta sa bag-o lang natapos nga Farmers’ Field School (FFS) sa corn production, nga nagahatag sang dugang nga ihibalo kag praktikal nga aplikasyon sang mga ini sang mga lokal nga mangunguma.
Ginpangunahan sang mga eksperto humalin sa Regional Corn Program, Research Division, kag Regional Crop Protection Center ang mga sesyon sa Integrated Pest Management, sustainable corn farming practices, kag mga estratehiya sa pagdumala sang fall armyworm nga amo isa sa mga mabudlay dumalahan nga mga peste para sa mga mangunguma sang mais sa rehiyon.
Nagtambong si DA-WV Regional Technical Director for Research and Regulations Zarlina B. Cuello kag naghatag sang iya mensahe kon sa diin iya ginpunto ang importansya sang pagpadamo sang produksyon sang mais sa ika-lima nga distrito sa Iloilo ilabi na sa mga “top-producing” nga mga munisipalidad kaangay sang Lemery, San Rafael, kag Barotac Viejo.
“There is a critical need to adopt biocontrol agents for sustainable farm management and to cluster small corn farmers for improved market access,” siling ni Cuello.
Iya man ginahatagan importansya ang clustering approach sang DA, nga nagapasanyog sang product consolidation kag market linkage para sa mga magagmay nga mga mangunguma kag ang balor sang pag-upod sang pagprodukto sang mais sa industriya sang kasapatan bangud ang livestock bill isa man sa mga prayoridad sang gobyerno.
Nagpalab-ot man sang kasadya sa programa ang mga ginkilala nga outstanding farmers nga ginbug-osan nanday Ramil Espole sang San Dionisio, Christine Vistal sang Barotac Viejo, Noriel Locsin humalin sa Batad, kag Arnold Balairos gikan sa San Rafael.
“It’s encouraging to feel recognized and valued as farmers,” suno kay Vistal.
Dugang naman ni Espole, ang SOA program “nagbukas sang bag-o nga oportunidad kag mas nagpabakod sang ila promisa sa padayon nga pagpanguma.”
Nagpasalamat naman ang hepe sang RAFIS nga si James Earl Ogatis sa suporta halin sa Municipal Agriculture Offices sang tagsa ka nagpasakop nga mga kabanwahanan, kag sa dedikasyon sang mga Agricultural Technicians nga naggiya sa mga mangunguma humalin sa enrollment tubtob sa assessments.
Ginpunto man ni Ogatis nga ang kadalag-an sang programa nasandig sa mabaskog nga suporta sang lokalidad.
Maluwas sa pagbaton sang certificates of completion, ang mga naggradwar ginpadyaan man sang corn seeders kag mga papremyo sa raffle kag iban pa nga mga aktibidad. (AAL/AGP/PIA 6 kalakip ang mga balita halin sa DA Western Visayas)
