DAVAO CITY, December 26 (PIA) —Human sa pila ka bulan nga pag-eskwela, 25 ka mga ‘friend rescued’ o kanhing myembro sa New People’s Army nga misurender na sa probinsyal nga kagamhanan sa Davao Oriental, nakabaton na og basic education pinaagi sa Alternative Learning System (ALS).
Sumala sa Provincial Information Office of Davao Oriental, pito ka mga ‘friend rescued’ migradwar sa Basic Literacy Program (BLP), walo sa elementarya, ug pulo sa secondarya.
Ang graduation ceremony gipahitabo sa Sitio Magay, Barangay Don Martin Marundan, Mati City niadtong December 17.
Sa maong seremonya, nakadawat sab ang matag ‘friend rescued’ ug P 65,000 gikan sa Enhanced Comprehensive Local Integrated Program (ECLIP); P 2,880 gikan sa Technical Education and Skills Development Authority (TESDA) para pangkapital isip mga National Certificate II (NC II) holder sa Bread and Pastry Production; ug P 50,000 gikan sa probinsyal nga kagamhanan alang sa dugang nga kapital.
Gipaabot ni Governor Niño Uy sa iyang mensahe ang pagpasalamat ug pagtimbaya ngadto sa mga ‘friend rescued’ alang sa ilang determinasyon sa pagkab-ot og edukasyon.
Gipasalamatan sab sa gobernador ang nagkalain-laing mga nakigtimbayayong nga mga ahensya sa ilang mga ‘reintegration programs’ alang sa mga ‘friends rescued’ lakip na ang edukasyon, pagbansay, ug panginabuhian.
Kauban sa mga nakigtimbayayong sa probsinyal nga panggamhanan alang sa edukasyon sa mga ‘friends rescued’, mao ang Provincial Social Welfare and Development Office (PSWDO)-Happy Home, ALS ubos sa the Department of Education (DepEd)-Schools Division of Mati City, Department of the Interior and Local Government (DILG), ug Technical Education and Skills Development Authority (TESDA). (MLU/PIA Davao Oriental/photos from Davao Oriental PIO)
