SYUDAD SANG ILOILO (PIA) — Bukas na sa liwat ang Visayan Sea para sa pagpangisda bangud opisyal na nga gintakpan sang Bureau of Fisheries and Aquatic Resources (BFAR) ang tuigan nga closed season sang Pebrero 18, matapos ang tatlo ka bulan nga “Pahuway sang Baybay.”
Bilang pagtanda sa ika-12 ka tuig umpisa nga gin-implementar ini magsugod ang 2013, ining science-based nga conservation measure nagapakita sang maayo nga mga resulta para masiguro ang tayuyon nga pagdamo sang fish species kaangay sang sardinas, herrings, kag mackerels suno sa BFAR.
“But let’s be clear, the closed season is just one management tool. If we want true sustainability, we need a comprehensive approach- balancing conservation with production, investing in aquaculture, and ensuring that our small-scale fishers remain at the heart of our efforts,” pahayag ni BFAR 6 Regional Director Remia A. Aparri.
Iya man ginpalab-ot sa mga lokal nga panguluhan kag mga mangingisda nga ang pagsunod sa responsable nga fishing practices indi kinahanglan tan-awon nga pagpakabudlay kundi isa ka “investment” agud may yara pirme nga makuha nga isda sa palaabuton.
Sa pagtugot sa fish stocks nga magpadamo sa liwat sa ti-on sang ila spawning period, ang ini nga inisyatibo naga-amot sa pag-improba sang catch sizes kag nagahatag benepisyo para sa mga magagmay kag commercial fishers apisar sang naga-eksister nga Illegal, Unreported and Unregulated (IUU) fishing.
Base sa preliminary data gikan sa National Stock Assessment Program (NSAP), nakitaan na sang senyales sang biological recovery, ilabi na sa pag-improba sang kadakuon sang sardinas sa pila na ka tuig.
Ang kadalag-an sa pag-implementar sang closed season ang resulta sang pagtililingob sang mga ahensya sang gobyerno, mga lokal nga panguluhan, kag fishing communities.
Para masiguro ang pag-comply sang implementasyon sang closed season, 49 ka joint seaborne patrols, 45 ka portside kag market inspections, 31 ka landing denial operations, kag 28 ka nagkalainlain nga information and education activities ang ginpatigayon sa Western Visayas.
Sa proseso, anum ka commercial-scale trawls kag tatlo ka modified Danish Seines (hulbot-hulbot) ang nakumpiskar sa sulod sang tatlo ka bulan.
“Our challenge to LGUs is this: provide your fishers with support beyond fisheries, ensure they have access to health services, education, and economic opportunities that will allow them to transition to more sustainable practices,” dugang pa ni Aparri.
Samtang nagapabilin ang konserbasyon bilang prayoridad, ginakilala sang BFAR kaupod sang ila partners ang mga paghangkat nga sosyo-ekonomiko sa patag sang pangisdaan.
Bangud diri, ginaagda ang mga lokal nga panguluhan nga maghatag sang serbisyo kag suporta medikal, edukasyon, kag alternatibo nga palangabuhian para mapahagan-hagan ang impact sang closed season.
Subongman, ginapasanyog pagid sang BFAR ang post-harvest practices, packaging, kag marketing support sini para mas mapataas ang balor sang mga produkto kaangay sang “tabagak” kag iban pa nga fishery products.
Ang closed fishing season sa bahin sang Visayan Sea ginpatuman gikan Nobyembre 15, 2024, tubtob Pebrero 15, 2025.
Sakop sa pagpatuman sini ang 25 ka mga lokal nga panguluhan sa Iloilo, Capiz, Negros Occidental, kag Cebu. (AAL/AGP/PIA 6 kalakip ang mga balita gikan sa BFAR 6)
