TAGBILARAN CITY, Bohol (PIA) – Abton sa serbisyo sa P244 million nga Integrated Potable Water System (PWS) ang 30 ka barangays sa Jagna.
Kini samtang gipahigayon ang paglubong sa kapsula ug groundbreaking sa multi-million nga proyekto nga gipundohan sa Department of Agriculture-Philippine Rural Development Project (DA-PRDP) Scale Up ug gitugbangan sa lungsod, niadtong Biyernes, Abril 4.
Ang DA PRDP mipundo og ₱244,042,875.80 magsilbi sa 30 ka barangay sa Jagna.
Ma-serbisyohan niining proyekto ang mga barangay sa Alejawan, Balili, Boctol, Bunga-Ilaya, Bunga Mar, Cabungaan, Cambugason, Can-ipol, Canjulao, Cantagay, Cantuyoc, Can-uba, Can-apilo, Kinagnan Lompong Malbog, Naatang, Nausok, Pagina, Pangdan, Poblacion, Tejero, Tubod Mar, ug Tubod Monte.
Si DA7 regional executive director Angel C. Enriquez mipadayag sa iyang kalipay sa munisipyo sa pag-aprobar sa proyekto sa PWS ubos sa PRDP.
“Na appreciate jud nako nga 30 ka barangays ug 5,929 households ang maserbisyohan aning atong project. Ang pinakaimportante jud, that finally, kay in this part of the country, nasolbad na ang problema sa tubig. Nindot na siya panumduman nga once in our lifetime, we’re able to have a change, finally, after 100 years,” matud pa ni Enriquez.
Gipahibalo usab niya nga ang munisipyo gitakdang bisitahon ni DA Sec. Francisco Tiu Laurel sa umaabot.
Uban sa PWS, makaserbisyo kini sa 5,929 ka mga panimalay, nga nakabenepisyo sa gibana-bana nga 28,770 ka mga residente, lakip ang 1,414 ka mga panimalay sa mag-uuma ug 45 ka mga panimalay sa mga mangingisda.
Si Jagna Mayor Joseph Rañola mihatag sa background ug rationale sa proyekto diin matud niya ang nag-unang problema sa munisipyo mao ang kakuwang sa supply sa tubig nga mainom.
Nagpasalamat kini sa DA-PRDP nga sa kataposan naaprobahan ang proposed PWS project, diin ang Jagnaaon ang makabenepisyo ug makapataas kini sa kahimtang sa panginabuhi sa maong lungsod.
Ang proyekto nagtumong sa paghatag og kasaligang suplay sa tubig nga mainom sa munisipyo, pagpakunhod sa oras nga gigugol sa pagkawos og tubig, pagpauswag sa kahimtang sa panglawas ug panginabuhi sa mga konstituwente, ug pagpakunhod sa mga sakit nga may kalabotan sa tubig.
Sa paghuman sa proyekto, gilauman nga makahatag kini og 24/7 nga suplay sa tubig. (ECB/PIA7-Bohol)
