CEBU CITY, Cebu (PIA) – Mikabat na sa 305 ka mga motorized banca o mga sakyanang pang-dagat ang narehistro nga mosalmot sa maong fluvial parade sa gihandum nga kapistahan sa Senyor Santo Niño sa Sugbo ug ang iyang ‘Sinulog Fluvial Festival.’
Ang Sinulog Festival nga nagpadayag sa pag-abot sa imahe sa Santo Niño sa isla sa Sugbo, ug ang pagpasugod sa pagkuyanap sa Kristiyanismo sa isla ug sa silingang kapuloan.
Matag tuig, daghan ang mga ‘bangka’ nga mosalmot ug mokuyog sa imahe nga anaa sa ‘galleon’ alang sa fluvial festival.
Sa mga narehistro, adunay 4 ka cargo vessel, 1 ka fast craft, 3 ka fishing boat/vessel, 217 ka motorized banca, 24 ka passenger cargo vessel, 4 ka recreational vessel, 1 ka service boat, 14 ka speed boat, 25 ka tugboat, ug 12 ka yate nga moapil sa fluvial parade.
Mahitungod niini ang Coast Guard District Central Visayas (CGDCV), kinsa mao’y responsable sa regulation sa kadagatan, mihatag og pipila ka mga pahinumdom sa mga angay ug dili angayang buhaton aron masiguro ang luwas ug halangdong pagsaulog sa kapistahan.
DO’s (Mga Angay Buhaton):
1. Sundon ang mga Lagda sa Kaluwasan sa Dagat:
- Magsul-ob og life jacket kung ikaw anaa sa usa ka sakayan nga miapil.
- Siguraduhang dili mosobra sa kapasidad sa sakayan ang iluwan.
- Sundon ang gitudlo nga ruta sa Philippine Coast Guard (PCG).
2. Moabot Sayu:
- Pangita og maayong lugar alang sa pagtan-aw kung ikaw anaa sa baybayon.
3. Tumanon ang mga balaan nga bansay:
- Pagpabilin nga hilom ug pagpakaseryoso atol sa mga pag-ampo og sagradong mga ritwal.
4. Basura sa Sakto nga Lugar:
- Magdala og og bag para sa mga basura aron masiguro nga ang basura dili ilabay sa dagat.
5. Paminawon ang mga Awtoridad:
- Sundon ang mga giya gikan sa PCG, kapulisan, ug uban pang organizer sa kalihokan alang sa kaluwasan ug kaayohan sa kadaghanan.
6. Seguroha’g amping ang mga personal nga butang:
- Tipigo ang imong mga personal nga butang sama sa cellphone, pitaka, o kamera sa mga waterproof nga bag kung naa ka duol sa tubig.
7. Magpaka-mahiangayon ug Magpakabana:
- Andama ang kaugalingon alang sa daghang tawo ug posibleng makalangan; ug pagbaton og positibo nga pamatasan.
DON’Ts (Mga Dili Angay Buhaton):
1. Ayaw Pagdala og mga Ginadili nga Butang:
- Likayi ang pagdala og hait nga mga butang, armas, o ginadili nga droga.
2. Ayaw Pagbuhat og Walay Pulos nga Kalihukan:
- Likayi ang pagtindog o paglihok nga dili angay sa mga sakayan aron malikayan ang aksidente.
- Ayaw pagsulay og langoy duol o palibot sa mga bangka.
3. Ayaw Paglabay og Basura:
- Ang paglabay sa basura sa dagat gidili pag-ayo kay kini naglapas sa kasagrado sa kalihokan ug makadaot sa palibot.
4. Ayaw Gamita ang mga Wala Gi-authorize nga Sakayan:
- Ang mga rehistrado ug awtorisado ra nga sakayan ang tugtan nga moapil sa fluvial parade.
5. Ayaw Pagpanghasol sa Prosisyon:
- Respetoha ang dagan sa fluvial parade; likayi ang pagputol o pagdisturbo sa mga sagradong prosesyon sa mga bangka.
6. Ayaw pag-inom og mga ilimnong makahubog:
- Ang pag-inom og mga ilimnong makahubog sa sakayan o samtang nagtan-aw sa kalihokan aron malikayan ang mga disgrasya, pagbugalbugal sa balaang bansay.
7. Ayaw ibaliwala ang mga ‘Emergency Protocols’:
- Pagmabinantayon sa mga emergency exits ug muster stations o meeting point sa mga pasahero sa sakayan, ug paminaw kanunay sa mga pahibalo.
Ipahigayon ang fluvial parade sa adlaw nga Sabado, Enero 18, 2025, vesperas sa kasaulogan sa ika-460 nga pista sa Señor Santo Niño, gikan sa alas 6:00 hangtod sa alas 8:00 sa buntag.
Mahimutang ang fluvial parade sa naandang Cebu-Mactan Channel nga mogikan sa Captain Veloso Port, Navforcen ug motapos ngadto sa Pier 1.
Mahitungod niini, ipatuman ang “No Sail Zone” sa gihisgotang adlaw gikan sa alas 4:00 hangtod sa alas 9:00 buntag sa agi-an sa mismong fluvial parade.
Aron malikayan usab ang mga insidente sa maritime, magpahigayon ang CGDCV og ‘dry run’ karong Enero 15, 2025 gikan sa alas 8:00 sa buntag ngadto sa 12:00 sa udto.
Atol sa ipahigayon nga dry run, gipasidad-an sa CGDCV ang mga marinero nga magpatuman og dugang nga ‘precautionary measures.’ (JJT/PIA 7)
