BAROY, Lanao del Norte (PIA) — Kapin tulo ka gatos nga pamilya dinhi ang makabenepisyo sa Pambansang Pabahay para sa Pilipino Housing (4PH) nga programa ilawom sa administrasyon ni Pangulong Ferdinand R. Marcos Jr.
Kini human nga gipahigayon ang groundbreaking ceremony sa pagtukod sa seven-story building nga duna pud playground ug swimming pool.
Makabenepisyo niini ang mga empleyado sa gobyerno nga mga miyembro sa Pag-IBIG Fund sama sa mga trabahante ug job order personnel worker sa lokal nga kagamhanan, pulis, sundalo, mga manunudlo og uban pa.
Sumala sa Department of Human Settlements and Urban Development (DHSUD)-10, mas barato kini nga pabahay tungod kay 5 percent ang i-subsidize sa gobyerno sa loan outstanding interest rate diin mahimong kapin P3,400 lang ang bayaran taga bulan sa mga benepisyaryo.
“Pasalamatan nato ang atong presidente ug secretary para aning programa. Ang atong goal ani kay katong mga low-income families magkabalay gayud. Kini ka gamay nga step makapausab sa kinabuhi sa mga lumulupyo dinhi sa Baroy,” matod ni DHSUD-10 Regional Director Ariel B. Abragan.
Samtang, nanawagan si Pag-IBIG Fund Trustee Anthony Cesar Arellano sa mga benepisyaryo nga tagaan og importansya ang maong programa.
“Tayo dapat magpasalamat lalo na sa oras ng municipal employees, teachers, job order personnel, Philippine National Police, at nurses. Welcome kayo dito sa housing ng Baroy. Kaya pangalagaan natin ang proyektong ito. Ang Pag-IBIG nandito lang nakabantay sa inyo at ganoon rin ang mother agency,” sumala niya.
Dako ang pasalamat sa mga taga-Baroy sa maong programa.
“Dako kaayo ko’g pasalamat sa atong mahal na Presidente Bongbong Marcos. Gikan sa akong puso, ako naa gyud ko sa administrasyon sa inyo, tungod sa paghimo kaning nia labi na kani daghan kaayong tawo ang matabangan,” sumala ni Mayor Grelina Mantohac-Lim.
Samtang, malipayon sab si Lilianie Baguio usa ka job order worker sa LGU Baroy kay dunay pabahay nga mas luwas kumpara sa ilang balay karon nga duol sa dagat nga delikado kung dunay bagyo.
Dako sab ang pasalamat ni Septiah Michelle Berdon, 24, empleyado sa lokal nga kagamhanan. Sumala niya, nakahuman siya og eskwela sa tabang sa scholarship og isip working student. Siya pod karon nagsuporta sa iyang pamilya ug gapaeskwela sa iyang mga igsoon. Bisan pa sa pag-atubang sa hagit, nagpabilin siyang malaumon alang sa mas hayag nga kaugmaon sa iyang pamilya pinaagi sa programa sa pabalay sa gobyerno.
“President, thank you so much nga naa ni nga project. Wa ko ga-expect, grabe ka overwhelming nga naay pabahay. Wala ko ga-expect nga naa diay ani nga posible nga mahitabo,” sumala niya.
Target nga mahuman ang konstruksyon sa maong proyekto sa 2025.
Mahinumduman nga adunay pud gipahigayon nga groundbreaking ceremony niadtong milabay’ng tuig para sa konstruksyon sa susamang program, usa ka 15-story twin-tower residential condominium nga dunay 750 units sa lungsod sa Tubod town. (LELA/PIA-10/Lanao del Norte)
