SYUDAD SANG ROXAS, Capiz (PIA) — Naglab-ot sa 15,926 ka yunit sang dugo ang natipon sang Philippine Red Cross-Capiz Chapter kaangot sa boluntaryo nga pag-donar sang dugo nga kampanya sa probinsya sang tuig 2024.
Ang nasambit nga numero ang katumbas sang 34 ka drum sang dugo bangud 450 milliliter ang tagsa ka yunit.
Ginpahayag ni Raymundo Martinez nga administrador sang PRC Capiz Chapter nga kapin sa duha ka porsiyento sang 804,952 nga populasyon sang probinsya ang nagdonar sang dugo sa nakaligad nga tuig.
Gindugang pa ni Martinez nga kadamuan sang mga blood donors ang nagikan sa mga bloodletting nga gin-organisa sang mga kabanwahanan, Red Cross Youth, mga grupo sang propesyonal, kag ospital.
Base sa rekord, ang Roxas City kag 16 ka mga kabanwahanan ang nakaabot sang isa ka porsiyento sang ila tagsa ka populasyon nga target para sa kampanya sa pag-donar sang dugo.
Samtang kapin naman sa 14,865 ka yunit sang dugo ang napagwa kag nagamit nagikan sa kabilogan nga nakolekta nga dugo sang nagligad nga tuig.
Ang “blood donation campaign” sa probinsya ang labi pa nga napabakod pinaagi sa mga ordinansa nga napasar sang probinsya kag mga kabanwahanan sang tuig 2024.
Ini ang ginalakipan sang Provincial Ordinance No. 377 nga nagahatag sang isa ka adlaw nga “leave of absence with pay” para sa mga opisyal kag empleyado sang probinsya nga maga-donar sang dugo kag mga ordinansa sang Roxas City kag kabanwahanan sang Maayon kag Pontevedra nga nagaduso sang voluntary blood service program sa ila natungdan nga mga lugar. (AGP/AAL/PIA Capiz)
