Nakahurot ang lungsod sa Moalboal, Cebu og 459 ka 50-kilo nga sako sa bugas sa unang pagpamaligya nila sa P20 kada kilo nga bugas sukad kini temporaryong gisuspenso tungod sa eleksyon. (Photo courtesy of Municipality of Moalboal)
CEBU CITY, Cebu (PIA) — Sa 600,000 ka sako sa bugas nga gidetermina nga mao’y kinahanglan sa kagamhanang probinsyal sa Cebu, aduna na’y 35,000 ka mga sako ang miabot sa pagpadayon sa “Benteng Bigas, Meron Na” (BBM Na!) nga inisyatiba ni Presidente Ferdinand Marcos, Jr., matud ni National Food Authority (NFA) Administrator Larry Lacson sa usa ka press release.
Ang BBM Na! program, nga gi-pilot test una sa Kabisayaan, nasugdan sa mga probinsya sa Cebu, Bohol, Siquijor, ug Southern Leyte — ang unang mga probinsya sa rehiyon nga midawat sa pa-gsubsidized sa programa sa bugas aron makabaligya ug matuman ang saad nga P20-kilo nga bugas.
Matud sa datos nga gipaambit ni Olma Nedia, information officer III sa NFA7, mikabat sa 3,081 ka sako ang total nga na-issue nga tag-50 kilo nga bugas, nga nakuha sa mga lungsod sa Sugbo sa ilang pagbaligya sa P20 kada kilo sukad Abril 28, 2025 hangtod Mayo 14, 2025.
Dugang ni Nedia nga gipaabot nga ma-diskarga na ang 35,000 ka mga sako sa bugas niining ikaduhang semana sa buwan sa Mayo.
Gipuntirya ni Presidente Marcos nga mapadayon ang maong inisyatiba, dili lang hangtod Disyembre ning tuiga, kondili hangtod matapos ang iyang termino sa tuig 2028.
Agi’g suporta sa pilot implementation sa BBM Na! sa Kabisayaan, gigahinan kini ni Presidente Marcos Jr. og P4.5 bilyon nga pesos gikan sa iyang ‘contingency fund’.
Busa, nagmando sa Department of Agriculture (DA) nga paninguhaon nga mapadayon ang maong inisyatiba hangtod matapos ang iyang termino sa 2028.
Gipaambit ni Lacson nga gilauman nga mahuman sa Hunyo ang pag-transfer sa dugang 240,000 ka sako paingon sa Cebu, gikan sa mga bodega sa NFA sa Mindoro ug Iloilo.
‘Mga tawo, nagpaabot sa baratong bugas’
Mipadayag usab si Mike T. Limpag, tigpamaba sa lungsod sa Moalboal, Cebu, nga dako ang ilang nahalin sa P20 nga bugas niadtong Mayo 13, 2025, nga mikabat sa 459 ka sako ang nahurot kutob alas 5 sa hapon, bisan pa nga wala kaayo masingog ang pagpamaligya niini samtang liwas ang maong adlaw sa eleksyon.
Kahinumdoman nga temporaryong gisuspenso ang pagpamaligya sa bugas tungod sa eleksyon.
Dugang ni Limpag, aron maakomodar ang dugang pang mga lumulupyo nga wala makapalit sa ilang pagbalik og baligya, mipadayon usab sila niadtong Mayo 14, 2025, nga nakahurot og kapin 200 ka sako sa bugas.
Kini nagtimailhan nga nag-atang ang publiko sa baratong bugas, matud pa ni Limpag.
“Giabangan (giatangan) gyud sa mga tawo ang resumption sa selling sa P20 per kilo nga rice,” ingon ni Limpag, ilabi na nga limitado lang sa 10 kilo kada balay matag semana ang mapalit.
Gawas sa Kabisayaan, nagbaligya na usab ang pilot implementation sa P20 kada kilo nga bugas sa mga KADIWA ng Pangulo centers ug sa pipila ka mga National Housing Authority (NHA) resettlement sites nga mipartisipar sa mga national food security emergency response sa gobyerno.
Alang sa dugang stock sa bugas sa laing mga probinsya nga mipartisipar, nagpaabot usab ang Siquijor sa ilang order nga 40,000 ka sako sa bugas, 30,000 alang sa Southern Leyte, ug 3,000 ka sako alang sa Bohol. (JJT/PIA7)
