MALAYBALAY CITY (PIA)— Traynta’y sais (36) ka mga kanhi lider ug combatant sa New People’s Army (NPA) ang misurender sa 403rd Brigade sa Philippine Army, 4th Infantry Division, diin gipresentar sila sa kasundaluhan ngadto sa mga opisyal sa probinsya sa Bukidnon atol sa seremonya niadtong Enero 10 sa Camp Osito Bahian, Malaybalay City.
Ang mga nagsurender gikan sa nagkalain-laing mga Guerilla Front mi-turnover og 55 ka mga de-kalibreng armas, lakip ang usa ka M-60 machine gun, isip saad sa pagsunod sa balaod sa gobyerno.
Si Brigadier General Michele Anayron Jr., commander sa 403rd Brigade, nagpasalamat sa 36 ka mga kanhi rebelde tungod sa desisyon nila nga mobalik sa sabakan sa balaod. Kini nga pagsurender, matud niya, usa ka mahinungdanon nga lakang sa pagkab-ot sa kahusay ug kalinaw sa Northern Mindanao.
“Akong pagpasalamat sa atong mga sundalo, pulis, local government units, civil society organizations, ug concerned citizens for participating in the ELCAC [End local communist armed conflict] campaign. Kini nga kampanya involves municipal, provincial, and line agencies. Naa sila gatabang sa ato pinaagi sa paghatag sa support services sama sa livelihood assistance, skills training, ug uban pa, aron masulbad ang insurgency problem sa nasud labi na dinhi sa atong probinsya sa Bukidnon,” matud sa Brigade Commander.
Gidasig usab niya ang mga nagpabilin pa sa walhong grupo nga mosurender na ug makig-ambit sa kalinaw.
Dugang pa ni BGen Anayron, nga ang pagsurender sa 36 ka mga kanhi rebelde sa NPA nagpakita sa pasalig sa gobyerno alang sa pagtapos sa insurgency ug pagpalambo sa malungtarong kalinaw.
Si Arnel Arcaya alias Sky, usa ka kanhi lider sa NPA, nagpaambit sa iyang mga kaagi sa teroristang grupo ug nagpasalamat sa gobyerno sa ilang mga paningkamot sa pagtabang kaniya alang sa pag-integrate balik sa katilingban.
Atol sa press conference, gisaysay ni Arcaya nga mas gipili niya nga biyaan ang teroristang grupo ug magsugod og bag-o. Dugang niya nga dako ang iyang pagsalig sa gobyerno aron matabangan sila sa pag-integrate sa komunidad ug masuportahan sila sa pagbalhin ngadto sa kinabuhing sibilyan.
Sa kasamtangan, gidayeg sa militar si Cong. Jonathan Keith Flores sa 2nd Congressional District tungod sa dakong suporta niini, diin maoy hinungdan nga padayon ang pagsurender sa mga kanhi lider ug miyembro sa New People’s Army.
Nagpasalamat si Cong. Flores sa mga nagsurender nga mga lider ug mga combatant sa NPA, lakip na sa lain-laing ahensya sa gobyerno, tungod sa kooperasyon aron masugpo ang problema sa insurgency.
“Ang presensya sa mga ahensya sa gobyerno sa kabukiran ug mga ka-barangayan nga naghatud sa mga kinahanglang serbisyo, nakadasig sa daghang rebeldeng NPA nga mobalik sa katilingban ug manginabuhi nga malinawon,” matud sa kongresista. (JBA/PIA 10-Bukidnon)
