GUINSILIBAN, Camiguin (PIA)–Sa usa ka talagsaon nga pagpakita sa pakiglambigit sa komunidad ug pagdumala sa kinaiyahan, kapin sa 30 ka madasigon nga mga partisipante ang nag-uban sa usa ka inisyatibo sa pagpananom og kahoy ubay sa North Poblacion Riverbanks, Agosto 29.
Gipangunahan sa mga opisyal sa North Poblacion Sangguniang Kabataan (SK), kini nga kalihokan nagsaulog sa International Youth Day ug Linggo ng Kabataan 2023, subay sa tema, “Green Skills for Youth Towards a Sustainable World.”
Ang “clean and green initiatives” sa SK gihatagan ug dakong kadasig pinaagi niining eco-friendly nga kalihokan. Si SK Chair Wishley Cañete miingon, “Kani siya nga activity every year gyud ni siya gina-celebrate para sa mga kabatan-onan, and especially this year, we focus on an environmental protection campaign which is under ni siya sa clean and green initiatives namo sa SK diri sa North Poblacion and kini karon nga atong gihimo karon part ra ni siya sa among program, which nag-start siya atong August 26.”
Ang pagtinabangay milabaw pa sa SK Council, tungod kay daghang mga lokal nga organisasyon ug ahensya ang nagtinabangay aron magmalampuson ang kalihokan. Ang mga kauban naglakip sa Provincial Environment and Natural Resources Office (PENRO) Camiguin, nga nanghatag ug mga seedlings sa kahoy alang sa planting initiative, Camiguin Water Company (CWC), Guinsiliban Municipal Police, ug ang Kabataan Kontra Droga at Terorismo (KKDAT).
Gawas sa tree planting event, gisiguro sa mga organizers nga ang selebrasyon molungtad og daghang mga adlaw, gikan sa Agosto 26 hangtod 28, 2023. Niini nga panahon, lain-laing mga kalihokan sa sports ang giorganisar, nga naghiusa sa mga lokal nga kabatan-onan aron sa pagpalambo sa panaghigalaay ug pisikal nga kahimsog.
Dugang pa, ang mga school kits gipang-apud-apod sa mga bata, nga nagpasiugda sa kamahinungdanon sa edukasyon og paghatag og mga kinahanglanon nga mga suplay aron masuportahan ang ilang pagkat-on.
Ang tree planting event wala lamang nagsilbi nga testamento sa dedikasyon sa mga lider sa kabatan-onan sa Guinsiliban apan nagpasiugda usab sa kamahinungdanon sa pagtinabangay nga mga paningkamot sa pagpalambo sa environmental sustainability ug youth development.
Samtang ang mga kahoy nga gitanom niining adlawa nagpadayon sa pagtubo, kini nagbarug isip usa ka buhi nga simbolo sa pasalig sa komunidad ngadto sa mas lunhaw ug mas malungtarong kaugmaon. (RTP/PIA-10/Camiguin)
Kapin sa 30 ka madasigon nga mga partisipante ang nag-uban sa usa ka tree-planting initiative ubay sa talan-awon nga North Poblacion Riverbanks, Agosto 29, 2023, aron sa pagsaulog sa International Youth Day ug Linggo ng Kabataan. (James M. Elaco/PIA-10/Camiguin)
