SYUDAD SANG ILOILO (PIA) — Ginkilala sang 3rd Infantry (Spearhead) Division sang Philippine Army ang ila mga partner sa kalinong kag katawhayan sa ginpatigayon nga “Pasidungog 2025: 3ID’s Tribute to Stakeholders,” sang Enero 20 sa Grand Xing Imperial Hotel sa Iloilo City.
Ginpangunahan nanday 3ID Commander Major General Marion R. Sison kag Assistant Division Commander subongman 301st Infantry Brigade Commander Brigadier General Michael Samson ang kahiwatan nga may tema, “Our Peace, Security, and Development: My Commitment, Responsibility, and Legacy.”
May 46 ka stakeholders gikan sa Panay kag Negros Islands ang nakabaton sang Spearhead Partner for Peace plaque bilang pagkilala sang ila dako nga kontribusyon sa misyon sang dibisyon. Ang ila suporta nangin kabahin sang paglab-ot sang kalinong, seguridad, kag pag-umwad sang Western kag Central Visayas.
Nalakip sa mga ginpasidunggan ang regional heads sang partner security forces kag government agencies, congressmen, local chief executives, pribado nga mga indibidwal, kag people’s organizations. Yara man ang staff officers sang 3ID, line units’ commanders, kag media partners nga nagtambong sa aktibidad.
Sa iya mensahe, ginpatungod ni Sison ang kadalag-an sa paglupig sang masobra 50 ka tuig na nga Communist Terrorist Group (CTG) sa Western kag Central Visayas paagi sa kolaborasyon sang tanan nga tagsakdag sa Regional Task Force to End Local Communist Armed Conflict (RTF-ELCAC).
“Your active participation made a significant difference in this campaign. We are now reaping the fruits of our sacrifices and hard work. It is during our time, through the efforts of individuals and agencies, that this decades-long menace has been brought to an end. It is during our watch, you men and women here today, that lasting peace has finally been achieved,” ginpahayag ni Sison.
Dugang pa sini, ang “vulnerability gap” sa mga apektado nga lokalidad nabuhinan na, rason ngaa nalikawan ang pagdako sang pwersa sang CTG. Dugang pa sini, bangud sa pagbinuligay, ang tanan nga mga tawo may kapareho na nga access sa mga oportunidad sa urban area. Suno sa iya, ang mga kadalag-an nga ini ginapanag-iyahan sang tanan.
Ginpunto man sang 3ID Commander nga ang padayon nga partnership sa mga stakeholder importante gid sa pagmintinar sang mga nalab-ot na sa bahin sang pagpaningkasog para sa kalinong, seguridad, kag kauswagan.
“To our partners, thank you for heeding our call. Thank you for walking this path with us. Thank you for believing in this fight, and most of all, thank you for your unfaltering love for our country and people,” pagpasalamat ni Sison. (AAL/AGP/PIA 6 kalakip ang mga balita gikan sa Philippine Army Spearhead Troopers)
