TAGBILARAN CITY, Bohol (PIA)— Pinaagi sa usa ka resolusyon, gipasagop na sa Bohol pinaagi sa mga tigpanday sa balaod niini ang upat ka mga kapanulundan nga opisyal nga local nga iapil sa imbentaryo sa mga kabilin nga anaa sa Philippine Registry of Heritage (PRH) sa National Commission for Culture and the Arts (NCCA).
Kini usab human ang Republic Act No. 10066, o ang “National Cultural Heritage Act of 2009,” nagmandu sa pagpanalipod, pagpatunhay ug pagduso sa kulturanhong kabilin sa nasud lakip na ang iynag mga kabtangan, kasaysayan ug ang mga karaang timailhan sa mga komunidad.
Gikan sa nasampit nga balaod, gimandu usab ngadto sa mga local nga kagamhanan ang pagtipig, pagmintinar sa mga listahan sa mga kulturanhong kabtangan lakip na ang paghimog mga dokumento niini aron makatabang sa pagpatunhay sa tradisyon ug mga kinaiya nga anaa sa ilang mga lugar.
Niini, gikaduso na sa SP Bohol, ngadto sa NCCA ang paghimo sa Asin Tibuok, ang Dayegon sa Bohol ug ang Tuob sa Bohol isip tulo sa mga dili mahikap nga kapanulundan, samtang sa natad sa natural nga kabilin, ang Lamanok Point sa Anda, Bohol, giduso na usab nga lakip sa nasudnong listahan sa kapanulundan sa nasud.
Kini usab human ang kagamhanang Probinsyal sa Bohol ubos sa Administrasyon ni Gob Erico Aristotle Aumentado, ug sa Center for Culture and Arts Development, nagpadagan sa mga kalihukan aron mahimoan og dugang mga pagtuon, pagdokumento, pag record ug pag update sa mga kullturanhong kabtangan isip kabahin usab sa iyang responsibilidad sa pagpahimsug ug pagbuhi sa kulturanhong kabilin sa Bohol.
Pinaagi sa cultural mapping ug sa gipalapdan nga programa sa cultural education, nagamhana usab ang mga kalungsuran sa pagparehistro sa ilang mga kulturanhong bansay, kabtangan ug mga kapanulundan ngadto na sa nasudnong listahan. (RAHC/PIA Bohol)
