SAN JOSE, Antique (PIA) — Ginkilala kang Department of Social Welfare and Development (DSWD) Antique ang mga awardees kang Provincial Search for 4Ps (Pantawid Pamilyang Pilipino Program) Exemplary Children 2024.
Pagkatapos kang screening kang nominees halin sa 18 ka mga munisipyo sa Antique, anom ka kabataan ang napilian bilang finalists kag nagpaindis-indis para sa grand prize kang Provincial Search nga ginhiwat sa Robinsons Antique Activity Center.
Si Richie Mae A. Napacia, 12 años halin sa banwa kang Patnongon, ang ginkilala nga grand prize winner kag ang mangin representante kang Antique sa Regional Search sa urihi nga bahin kang tuig.
Sa sangka mensahe, gin-agda ni Napacia ang mga kapareho nga 4Ps children nga maghimakas para makatapos sa anda pag-eskwela para sa mayad nga bwas-damlag indi lang para sa anda nga kaugalingon kundi pati man sa anda nga tagsa ka pamilya.
Dugang pa ni Napacia, nga naggradwar nga class valedictorian kang Aureliana Elementary School, tinguhaan na nga mangin inspirasyon para sa iban nga kabataan nga maghimakas sa tunga kang kapigadohon para malambot anda nga handum.
Samtang, ginkilala duman nga 1st runner-up si Fhrynxz Theodore M. Chavez halin sa Libertad, nga ginsundan man nanday Jeiah Belle P. Dubria kang Barbaza, Maurine B. Mordeno kang Pandan, John Mark C. Tanio kang Belison, kag Benson Galano kang Anini-y.
Kada sara sa mga exemplary child winners nakabaton kang certificate, trophy, cash prize, kag school supplies.
Sa anang mensahe, ginpabutyag ni DSWD Western Visayas 4Ps Division Chief Belen Gebusion nga ang aktibidad tuyo tugruan igtalopangod ang kadarag-an kang mga kabataan nga benepisyaryo kang 4Ps.
Hambal ni Gebusion, bahul ang bulig kang 4Ps nga programa para maka-eskwela ang mga kabataan kag makabaton kang nagkalain-lain nga oportunidad.
Nagapati man si Gebusion nga ang 4Ps exemplary children nagapakita kang kadarag-an kang 4Ps nga programa sa pagpamayad kang kabuhi kang duro nga pamilyang Pilipino.
Sa anang bahin, ginpasalamatan ni Antique Provincial Social Welfare and Development Officer (PSWDO) Lazaro Petinglay ang DSWD para wara untat nga suporta kag bulig para sa mga Antiqueño nga nagakinahanglan. (AGP/BPS/PIA Antique)
