SIQUIJOR, Siquijor (PIA) – Giila ug gipasidunggan sa Department of Social Welfare and Development (DSWD)-Siquijor ang mga awardees sa Provincial Search for Pantawid Pamilyang Pilipino Program (4Ps) Exemplary Children 2024.
Human sa masusing pagpamatod sa mga nominado gikan sa unom ka lungsod sa Siquijor, si Yasmin B. Baguio, 11 anyos nga taga Ytaya, Lazi, Siquijor, giila nga mananaog alang sa 4Ps exemplary child karong tuiga sa Siquijor.
Ang adbokasiya ni Baguio nga financial literacy nagpahimutang kaniya gikan sa uban pang mga nominado pinaagi sa pagpasabot sa kamahinungdanon sa pagtigom ug pag-invest alang sa seguridad sa umalabot, nga nagtugma sa mga angayan sa programa alang sa mga benepisyaryo.
Sa usa ka presentasyon, gidasig ni Baguio ang mga batan-on sa pagsiguro sa ilang kaugmaon.
“Ang akong advocacy is encouraging young as elementary (adbokasiya mao ang pagdasig sa mga batan-on isip elementary) nga magsave ug mag-invest para sa ilang brighter future (hayag nga kaugmaon) nga parehas nako, naka-save nako sa PMPC para pud sa akong brighter future,” ingon niya.
Sa samang higayon, giila nga 1st runner-up si Cristal Mae A. Lambiguit sa Maria, Siquijor, gisundan nila ni Frenziemer Candy I. Balingit sa Enrique Villanueva, Siquijor, John Darren O. Ates sa Siquijor, Siquijor, ug Siquijiah Joy Abing sa San Juan, Siquijor.
Ang matag usa nga mananaog nakadawat ug plaque ug ganti’ng salapi.
Nagsugod pa lang ang panaw ni Baguio,samtang siya nangandam sa pagdala sa ngalan sa probinsya sa Siquijor alang sa Regional Search karong tuiga, diin naglaum siya nga madugangan pa ang iyang mensahe sa paghatag ug empowerment sa mga kabatan-onan pinagi sa financial literacy.
Ang inisyatibo sa DSWD nagpasiugda sa kamahinungdanon sa pakiglambigit sa mga kabatan-onan sa pagpalambo sa komunidad ug mga programa sa kaayohan sa katilingban, nga nagtinguha sa pag-ugmad sa usa ka henerasyon nga naghatag ug bili sa responsibilidad, kalig-on, ug adbokasiya. (MSH/PIA7-Siquijor)
