TAGBILARAN CITY, Bohol (PIA) – Gipahigayon sa lalawigan sa Bohol ang ika-4 nga International Flower Festival niadtong Nobyembre 21-22, 2024.
Ang tema sa festival karong tuiga, “Immortal Flowers,” nagpasiugda sa usa ka harmonious nga kombinasyon sa natural ug artipisyal nga mga bulak nga gisalmotan sa 20 ka master florists sa tibuok kalibutan.
Ang mga inila nga master designers gikan sa tibuok kalibutan mipakita ug miusab sa ilang artistic nga mga panan-awon ngadto sa makahingangha nga mga floral display sa Be Grand Resort sa lungsod sa Panglao.
Ang Grand Bohol Harvest, ang grand finale sa 2024 Bohol International Flower, Food, and Wine Festival gipahigayon niadtong Nobyembre 22 diin ang mga international master florists nakigtambayayong sa 20 ka Boholano ug Cebuano fashion designers aron ipakita ang ilang mga mugna.
Si Cong. Vanessa Aumentado nipasigarbo sa pagkatudlo sa lalawigan isip labing una ug bugtong UNESCO Global Geopark sa nasud sa iyang pag-abiabi sa mga bisita atol sa pagbukas sa Bohol International Flower Festival Fashion Show.
Sa ngalan ni Gob. Erico Aristotle Aumentado ug Bise Gobernador Tita Baja, iyang gipahalipayan ang mga organizers ug mga kaubang sponsors ug mipadayag og pasalamat sa ilang mga paningkamot.
Matud pa niini nga ang Bohol nagrepresentar sa labing maayo sa nasud, ang katahum, pagkamamugnaon, kainit, ug kalig-on.
Si Department of Tourism (DOT) Asec. Judilyn Quiachon, sa ngalan ni Sec. Christina Garcia-Frasco, sa iyang mensahe nagpasiugda sa pasalig sa probinsya sa kabilin, pagpreserbar sa kinaiyahan, ug kabag-ohan nga naghimo niini nga usa ka talagsaon ug madanihon nga destinasyon.
Gipakita sa BIFF ang kolaborasyon sa mga master florists uban sa mga tigdesinyo sa fashion uban ang usa ka showcase sa lawas o masul-ob nga mga bulak.
Ang European ug Asian master florists naglakip nila Opas Yarcammee (Thailand), Sandra Taslim (Indonesia), Cindy Chao (Macau), Chrisie Chung (Hongkong), Jhiwa Song (Seoul), Iza Tcakzyk (Poland), Nguyen Phi Minh (Thailand), Minsok Soong (South Korea), Win Chan (Kuala Lumpur), Kazuhiko Tanaka (Japan), Knox Sio Sio (Taipa), Komang Budinata (Bali), Lili Beelen (Netherlands), Kathy Ong (Malaysia), Tamas Mezoffy (Hungary), Christina Yew (Singapore), Pirjo Koppi (Finland).
Ang mga Bol-anong sila Yu, Joseph Dumadag, ug Melit Andoy mipakita usab sa ilang mga mugna sa bulak.
Si BIFF organizer ug florist Michael Yu, sa pakighinabi sa sidelines nagsanag sa garbo samtang iyang gipaambit kung giunsa ang pag-uswag sa kalihokan gikan sa usa ka eksibit sa usa ka florist pre-pandemic hangtod karon nga talan-awon.
Usa sa highlight sa maong kalihokan mao ang Helena Grand Harvest Award nga gihatag kang Victoria Wallace sa Bohol Bee Farm alang sa iyang suod ug lawom nga gugma sa mga bulak, tanaman, hayop, ug pagkaon.
Sa wala pa ang fashion show, 14 ka food exhibitors ang mipakita sa ilang mga pagkaon gamit ang local nga mga sagol aron sa pagpasiugda sa Boholano flavors. (ECB/PIA7-Bohol)
