TAGBILARAN CITY, Bohol (PIA) — Gitangtang na sa Bureau of Internal Revenue (BIR) ang lima ka tuig nga validity period sa electronic Certificate Authorizing Registration (eCAR).
Kini human gipagawas sa BIR ang Revenue Regulation (RR) No. 12-2024 nga nagpalugway sa validity sa tanang eCARs hangtod nga kini mapresentar sa hingtungdang Registry of Deeds.
Ubos sa RR No. 12, ang mga CAR lang nga gi-isyu sa gawas sa eCAR system ang tugotan alang sa revalidation.
Ang CAR nga gi-isyu sa BIR, nagtugot sa Land Registration Authority (LRA) sa pagbalhin sa pagpanag-iya sa mga real property nga resulta sa pagbaligya, donasyon, ug uban pang paagi sa pagbalhin sa pangalan nga anaa sa dokumento sa proyedad.
Ang CAR usa ka pagmatuod nga ang pagbalhin sa propiedad gitaho, ug ang tanan nga gikinahanglan nga buhis kompleto na nga gibayran sa magbubuhis.
Sa wala pa ang RR No. 12-2024, ang validity period sa eCAR lima ka tuig.
Hinuon, ang BIR nagkanayon nga dili tanang eCARs ang gipresentar sulod sa validity period.
Ang mga magbubuhis kaniadto kinahanglan nga mohangyo sa reissuance sa eCAR, nga usa ka wala kinahanglana nga palas-anon sa mga magbubuhis.
Sa usa ka pahayag, si BIR Commissioner Romeo Lumagui Jr. niingon nga ubos sa Bagong Pilipinas, ang BIR mahimo usab nga service-oriented agency, dili lang collection-oriented.
Matud pa nga unsa man ang mahimo sa buhatan aron matabangan nga mapagaan ang palas-anon sa mga magbubuhis sa pagbayad sa ilang buhis, ilang ipatuman. (ECB/PIA7-Bohol)
