MALAYBALAY CITY (PIA)–Kapin sa 5,000 ka agrarian reform beneficiaries (ARBs) ang makabenepisyo sa Republic Act (RA) 11953, nga nailhan nga New Agrarian Emancipation Act (NAEA), human sa bag-ohay nga paglusad sa Condonation Response Desk (CORD) sa Department of Agrarian Reform (DAR) sa Bukidnon.
Si Regional Director Zoraida Macadindang sa DAR-Northern Mindanao miingon nga gipirmahan ni Presidente Ferdinand R. Marcos Jr. ang NAEA nga mahimong balaod kaniadtong Hulyo 9 ning tuiga, nga nag-condone sa tanan nga mga pautang, lakip ang interes, mga penalty, ug mga ‘surcharge’ nga nakuha sa mga ARB gikan sa yuta nga gihatag kanila ug gitikad.
Miingon siya nga ang CORD nagsilbi nga command center aron mapadali ang pagproseso sa gikinahanglang mga dokumento para sa ARBs sa 20 ka lungsod ug duha ka siyudad sa probinsiya agig pagsunod sa bag-ong balaod.
“Ang CORD nagtumong sa pagpalingkawas sa mga ARB gikan sa pagkaulipon sa utang, paghatag kanila ug lugway sa pagpausbaw sa produkto sa uma. Ang mga abogado sa reporma sa agraryo ibutang sa mga quick response center aron motabang sa pagproseso sa mga aplikasyon sa ARBs alang sa ‘condonation’ sa utang ug ‘amortization’ ubos sa RA 11953 o sa NAEA,” matud ni Macadindang.
Ang mga benepisyo sa balaod alang sa ARBs naglakip sa exemption sa pagbayad sa “estate tax” ug “mandatory inclusion sa Registry System of Basic Sectors in Agriculture” aron mahatagan sila ug sayon nga access sa mga support services sa Department of Agriculture, dugang niya.
Si Atty. Mitchell Talatala, nga nagrepresentar kang Malaybalay City Mayor Jay Warren Pabillaran, niingon nga ang kagamhanan sa dakbayan kinasingkasing nga nagpaluyo sa mga programa sa DAR.
“Ang Bag-ong Agrarian Emancipation Act nag-waive sa mga utang ug bayronon, lakip na ang “real property tax condonations” para sa atong agrarian reform beneficiaries. Nakahatag kini og dakong positibo nga epekto sa ilang kinabuhi,” matud pa ni Talatala.
Samtang, gipahayag ni DAR-Bukidnon Provincial Agrarian Reform Officer Jammal Pangandaman nga ang bag-ong agrarian reform law naghatag ug gahom sa mga mag-uuma sa pagpalig-on ug pagpanalipod sa ilang mga katungod.
“Ang reporma sa agraryo dili lamang usa ka hugpong sa mga palisiya. Kini usa ka kalihokan sa hustisya sa katilingban. Nagtuyok kini sa paghatag gahum sa mga mag-uuma, mga marginalized, ug walay yuta nga mga indibidwal,” sumala ni Pangandaman. (BGEPan/PIA 10/Bukidnon)
