SYUDAD SANG ILOILO (PIA) — May kabug-usan nga 600 nga mga bumulutho sa rehiyon ang nakapasar sa ginhiwat nga pasinawan sang Department of Science and Technology-Science Education Institute (DOST-SEI) para sa undergraduate scholarship programs sini.
Sa ini nga numero, 318 sa mga nakapasar ang napaidalom sa Republic Act 7687 kun sa diin idedikar ini sa pagsuporta sa mga maalam kag maabilidad nga mga estudyante gikan sa pigado nga sektor. Samtang, 282 naman ang kwalipikado sa Merit Scholarship nga ginatanyag sa mga bumulutho nga may mataas nga kinaadman sa bahin sang Science, Technology, Engineering, and Mathematics (STEM).
Sa probinsya sang Aklan 49 nga mga estudyante ang nakapasar, 32 naman sa Antique, 40 sa Capiz, 14 sa Guimaras, 263 sa Iloilo kag 202 naman sa bahin sang Negros Occidental.
Ang mga incoming college freshmen qualifiers ang makaagom sang benepisyo sang scholarship sa nahauna nga semestre sang academic year 2024-2025.
Nalakip sa mga mga benepisyo nga mabaton amo ang P8,000 nga allowance kada bulan, transportation allowance, clothing allowance, P40,000 nga balor sang tuition kag iban pa nga mga school fees kada tuig sa mga iskolar nga nag-enrol sa pribado nga kolehiyo, P10,000 para sa learning materials ukon connectivity allowance, P10,000 nga thesis allowance, graduation allowance, kag premium insurance.
Suno sa impormasyon sang DOST-SEI, naglab-ot sa 89,510 nga mga bumulutho ang nagkuha sang pasinawan sang on April 6-7, 2024 sa 205 ka mga test centers sa bug-os nga pungsod.
Para kay Engr. Albert G. Mariño, Director III kag Officer-in-Charge sang DOST-SEI, isa ka bugal sang ahensya ang maghatag sang scholarship sa mga takus nga estudyante kalakip man ang paghanas sang ila potensyal sa patag sang siyensya kag teknolohiya.
“Our vision is that through these scholarships, we can provide equal opportunities for the students to have such kind of affordances that can equip them with the right tools and knowledge to become the future STEM leaders of this country,” pahayag ni Engr. Mariño.
Pagahatagan sang notices of award ang mga kwalipikado kag sila ang magapaidalom sang orientation tuhoy sa polosiya sang scholarship kaupod ang ila ginikanan ukon legal guardians.
Ginakinahanglan nga ang mga estudyante ang magapasakop sa Bachelor of Science (BS) degree program sa mga prayoridad nga mga Science and Technology (S&T) fields of study sa state university, kolehiyo, ukon mga pribado nga institusyon sang higher education nga ginakilala sang Commission on Higher Education (CHED) bilang Center of Excellence, ukon Center of Development, ukon may yara sang Federation of Accrediting Agencies of the Philippines Level III accreditation para sa BS program nga tinutuyo nila nga magpa-enrol.
Tinutuyo sang scholarship grant nga palig-unon kag hikayaton ang mga kabataan nga Pilipino sa pagkuha sang propesyon sa bahin sang siyensiya kag teknolohiya, nga makasiguro sang kalipikado nga S&T human resources nga magabulig sa padayon nga pag-uswag sang pungsod. (AAL/LMLE/PIA Iloilo)
