SYUDAD SANG ROXAS, Capiz (PIA) — Naglab-ot na sa 681,727 ka mga Capiznon ang naka-rehistro sa Philippine Identification System base sa Enero 31, 2025 nga rekord sang Philippine Statistics Authority.
Ginpahayag ni Anna Bolante nga Public Information Officer sang PSA Capiz nga ang numero ang naga-representa sang 81.22 ka porsiyento sang Update Projected Mid-Year Population for the Philippines base sa 2015 nga resulta sang Census of Population.
Samtang, gindugang pa ni Bolante nga gina-akomodar na ang tanan nga edad sa nagapadayon nga pagpanglista sa PhilSys.
Nahibaluan nga ang pagpanglista sa mga kabataan nga may edad isa ka tuig paidalum ang nag-umpisa pa sadtong katapusan nga kwarter sang tuig 2024.
Ang pagpanglista sa PhilSys ang nagapadayon sa may CityMall Roxas Avenue kag Robinsons Place-Roxas nga lunsay diri sa syudad sang Roxas.
Ang registration center sa CityMall Roxas Avenue ang nagabaton man sang mga koreksyon kag pag-update sang mga rekord nga mga concern sang national ID.
Gindugang pa ni Bolante nga may ginpatigayon man ang PSA nga mobile registration sa mga kabanwahanan agud nga mas mapalapit ang serbisyo sang PhilSys sa mga katawhan.
Kapin na sa 592,363 ka mga national ID nga PVC card ang na-deliver sa mga nakarehistro sa PhilSys sa probinsya base sa Enero 24 nga rekord sang PSA kag 210,444 naman nga national ID sa papel ang napanghatag pagtapos sang Enero 2025.
Ang PSA ang nagapaandam man sa publiko nga indi magpati sa mga nabaton nga text ukon tawag nga nagapangayo sang personal nga mga detalye agud ma-update ang rekord sa national ID bangud ang nasambit nga serbisyo ang personal nga transaksyon sa registration center. (AGP/AAL/PIA Capiz)
