ROXAS CITY, Capiz (PIA) — Nakabaton ang 7,000 nga mangingisda sa probinsya sang food packs halin sa Capiz provincial government paagi sa “Task Force Pagdumdum.”
Suno kay Atty. Luvim Amores, provincial government Public Information Officer, may ara isa ka libo nga mangingisda ang nakabaton sang ayuda sa kada banwa sang Ivisan, Sapian, Panay, Pontevedra, President Roxas, Pilar kag Syudad sang Roxas sa duha ka adlaw nga pagdul-ong sang mga food packs humalin Oktubre 30 asta 31.
Ginpahayag man ni Amores nga ang mga food packs wala ginakabig nga bulig para sa mga pumuluyo nga naapektuhan sang makusog nga Severe Tropical Storm Kristine kundi parte ini sang regular nga programa sang gobyerno probinsyal para sa mga pumuluyo nga nagapangisda kada katapusan sang tuig.
“Kada Oktubre asta Disyembre, bal-an naton nga ang dagat medyo mabalod, so ang aton mangingisda wala palangitan-an. It is part of our regular program nga naga dala kita sang food packs nga ayuda sa aton mangingisda sa mga coastal areas,” suno kay Amores.
Nagpahayag man sang iya pagpasalamat sa gobyerno probinsyal si Ivisan vice mayor Jose Romeo Yap.
“Kabay nga ini nga food packs makabulig kag maka pihan-pihan kay tungod sige pa ang ulan, mabaskog pa ang lawod hindi pa ang mga mangingisda makalakat,” pahayag niya.
Suno naman kay Ressurection Apaitan Jr., isa sa benepisyaryo sang Brgy. Balaring, Ivisan nga ang iya pamilya ang naga depende sang ila pang adlaw adlaw nga palangabuhian sa lawod.
“Kung mahatagan man kami dutay nga pang adlaw-adlaw namon [makabulg gid] kay subong waay gid pangita kay baskog pa, may bagyo pa,” pahayag sini. (AGP/PLF/PIA Capiz)
