SYUDAD SANG ILOILO (PIA) – Nakabaton sang P65,000 nga immediate livelihood assistance ang siyam ka mga anay rebelde sa probinsya sang Iloilo sa idalom sang Enhanced Comprehensive Local Integration Program (E-CLIP) sang Department of the Interior and Local Government (DILG).
Ang pagpanagtag sang ayuda nga nagalab-ot sa kabug-usan nga P585,000 ang ginpangunahan nanday Iloilo Provincial Administrator Dr. Raul Banias, DILG-Iloilo director Engr. Carmelo Orbista, kag 301st Infantry Brigade 3rd Infantry Division Commander BGen. Michael Samson sa ginhiwat nga ika-4 nga quarter nga pagsinapol sang Provincial Peace and Order Council (PPOC) sang Nobyembre 19, 2024.
Nakabaton man sang P84,000 ang 31st Military Intelligence Company (MICO) kag ang 3 Military Intelligence Bureau (MIB); samtang ang 61st Infantry Battalion nakabaton sang P105,000 bilang reintegration assistance.
Ginpahayag naman ni Samson nga ini nga mga pagtinguha sang gobyerno, lakip ang pagpanagtag sang mga serbisyo, nagaamot sa pagnubo sang ikasarang sang CPP-NPA.
“These government efforts, like the distribution of checks through E-CLIP, contribute to the degradation of their capabilities. What we look forward for the end of this year is to declare the area a stable internal peace status. Hopefully all of them will go back to mainstream society, but to those who insist on fighting, our operations still continue,” siling ni Samson.
Ang E-CLIP isa ka programa nga ginadumalahan sang DILG kag sang Department of National Defense (DND) nga gindesinyo sa pagbulig sa pagbalik sang mga anay rebelde kag paghatag sang pinansyal nga suporta sa ila.
Samtang, ang PPOC sa ila sinapol, nagpresentar man sang mga updates may kaangtanan sa sitwasyon sang kalinong kag seguridad sang probinsya.
Magluwas sa sitwasyon sang kalinong kag seguridad nga ginpresentar sang Iloilo Police Provincial Office kag Philippine Army, gintalakay man sang Bureau of Fire Protection (BFP)-Iloilo ang mga update sa mga insidente sang sunog sa probinsya, samtang ang Iloilo Provincial Planning and Development Office (PPDO) nagpresentar sang mga updates sa ginaduso nga pagpatigayon sang Road Safety Summit.
Ginpakigbahin naman ni Department of the Interior and Local Government (DILG)-Iloilo director Engr. Carmelo Orbista ang mga update sa status sang implementasyon sang Support to Barangay Development Program (SBDP), Retooled Community Support Program (RCSP), kag Enhanced Comprehensive Local Integration Program (E-CLIP).
Ang PPOC nagpasar man sang duha ka resolusyon, nga aprobahan kag hatagan sang awtoridad ang gobernador nga i-release kag gamiton ang confidential fund sang probinsya sang Iloilo para sa 4th quarter; kag ang resolusyon nga nagapasangkad sang POPS Plan Technical Working Group. (AAL/JNH/PIA Iloilo)
