SYUDAD SANG ILOILO (PIA) – May kapin 9,000 ka mga trabaho sa nagkalain-lain nga mga employers ang nagahulat para sa jobseekers sa palaabuton nga Labor Day Job Fair nga pagapangunahan sang Department of Labor and Employment (DOLE) Western Visayas sa Mayo 1, 2025 sa Robinson’s Place, syudad sang Iloilo.
May tema nga, “Manggagawang Pilipino, Kaagapay sa Pag-unlad; Sandigan ng Mas Matatag na Bagong Pilipinas,” ang job fair ginalantaw nga maghatag sang oportunidad sa mga nagatrabaho bilang pagkilala sang ila importante nga papel sa pagpa-uswag sang ekonomiya sang pungsod.
Ginpakigbahin ni DOLE Regional Director Sixto T. Rodriguez Jr. ang malapad nga sakop sang vacancies lakip na ang cashier, accounting staff and assistants, service crew, kag marketing managers. Suno sa iya, may yara man skills-related nga mga trabaho nga available para sa drivers, mekaniko, kag welders.
Ang mga industriya nga may pinakamadamo nga vacancies amo ang administrative kag support service, wholesale kag retail, constructions, financial kag insurance companies, transport kag storage, kag manufacturing.
Ang iban pa nga job offerings amo ang sa bahin sang information kag communication, agrikultura, real estate, mining kag quarrying, hotel kag restaurants, amo man ang sa health kag wellness.
Ginhatagan pagtamod ni Rodriguez nga ang job fair magahatag man oportunidad para sa high school graduates, kag sa mga nakatapos sang technical kag vocational courses.
Ginapanugyan sa mga interesado nga mga aplikante nga magrehistro online sa https://dolero6.org/ para sa masulhay nga pagproseso sang ila aplikasyon.
Maluwas sa mga trabaho, ang job fair magafeature man sang Kadiwa ng Pangulo centers nga may yara 40 kag mga tagbaligya halin sa 32 ka enterprises nga magabaligya sang lab-as, masustansiya, kag barato nga mga produkto agrikultural, processed foods, native products, dairy products, kag iban pa nga halin sa livelihood projects sang impormal nga sektor.
Mahibal-an nga ang Kadiwa ng Pangulo nagabukas sang market opportunities para sa mga mangunguma, mangingisda, kag sa mga lokal nga prodyuser paagi sa pagpauswag sang ila kita sa pagbaligya sang lab-as kag barato nga mga produkto direkta sa merkado.
Kabahin man sang selebrasyon sang 123rd Labor Day, maga-feature man sang releasing sang fund assistance sa idalom sang emergency employment program humalin Abril 14 tubtob Mayo 1, 2025.
Suno sa DOLE, may yara sa karon kapin 35,746 ka informal workers sa bug-os nga rehiyon nga nakatakda nga makabenepisyo gikan sa P173 milyon nga emergency employment assistance.
Para makahatag sang bug-os nga serbisyo sa mga nagatrabaho, mangin available man ang One-Stop Shop para magbaton sa mga pamangkot kag maghatag bulig sa mga walk-in clients.
Pila sa mga ahensya sang gobyerno nga gin-imbitar nga magbulig sa hilikuton amo ang Technical Education and Skills Development Authority, Department of Health, Philippine National Police, Overseas Workers Welfare Administration, Employees’ Compensation Commission, Department of Migrant Workers, Social Security System, Home Development Mutual Fund (Pag-IBIG), Philippine Health Insurance Corporation (PhilHealth), Philippine Statistics Authority, Professional Regulation Commission, kag National Bureau of Investigation. (AAL/AGP/PIA 6 kalakip ang mga balita gikan sa DOLE Western Visayas)
