PUERTO PRINCESA, Palawan (PIA) — Nasa 250 agricultural extension workers sa buong lalawigan ang nagtipon-tipon kamakailan sa ginanap na kauna-unahang ‘Agricultural Extension Workers Summit’.
Ang aktibidad ay pinangasiwaan ng Office of the Provincial Agriculturist (OPA) sa pamumuno ni Provincial Agriculturist Dr. Romeo M. Cabungcal katuwang ang Department of Agriculture (DA) Mimaropa at iba pang katuwang na mga ahensiya ng pamahalaan.
Ayon kay Cabungcal, layunin ng aktibidad na mapataas ang antas ng kamalayan ng mga natukoy na manggagawa kaugnay sa papel na kanilang ginagampanan upang mapalago ang pagsasaka at pangingisda sa lalawigan na isa rin sa pangunahing sektor na tinututukan ng Pamahalaang Panlalawigan ng Palawan.
Kabilang sa mga tinalakay sa summit ay ang mga sumusunod: Programs and Projects for Enhanced Agricultural Extension; Programs and Projects for Supporting Fisheries Extension; Provincial-led Agriculture and Fisheries Extension System (PAFES) in Palawan; Challenges and Opportunities on Agricultural Extension, at Ways Forward on Effective Agriculture and Fisheries Extension na tinalakay ng mga eksperto sa agrikultura.
Kaugnay nito ay nagkaroon din ng ‘Tekno Barakalan’ na nilahukan ng iba’t-ibang partner agencies na kinabibilangan ng SL Agritech Corporation, Seedworks Philippines, Longping Tropical Rice Development, Inc., Bayer Philippines, BFAR Mimaropa, Palawan Organic Farmers Association, Landbank of the Philippines, Narra Organic Farmers Association at Agricultural Training Institute-Mimaropa upang ipakilala at ipakita ang mga produkto, programa at serbisyo na maaaring maipagkaloob sa mga magsasaka’t mangingisda sa lalawigan. Ito ay bahagi rin ng Baragatan sa Palawan Festival 2023. (OCJ/PIA Mimaropa-Palawan)
Ang nasa 250 na dumalo sa kauna-unahang ‘Agricultural Extension Workers Summit’ sa Palawan kamakailan. (Larawan sa itaas at ibaba ay mula sa PIO-Palawan)
