Sambilog sa ginhiwat nga aktibidades sa nasambit nga “mental camp” hay team building kung siin nagapakita raya it kooperayon ag suporta sa kada isaea nga mga partisipante. (Photo courtesy of AKPPGO)
KALIBO, Aklan (PIA) — Ro Probinsya it Aklan paagi sa Provincial Health Office (PHO) iya, kaibahan ro Aklan Provincial Population and Gender Office (AKPPGO), naghiwat kunduraya eang it unang batch it Mental Health Camp sa Ati-Atihan Festival Hotel, Kalibo, Aklan.
Nagsanto raya sa pag-obserbar it probinsya it Suicide Prevention Month ku Setyembre.
May kabilugan nga 30 ka mga peer educators halin sa nagkasari-sari nga mga munisipalidad ro nag-atender sa primero nga batch it Mental Health Camp ku Sept. 14, 2024. May ina nga team-building nga aktibidades sa nasambit nga “camp” nga nagpakita it kooperayon ag suporta sa kada isaea nga mga partisipante.
May ina man nga hinun-anon nga may kaangtanan sa pag-umwad it mga pamatan-on, kaibahan kara ro pag-intindi sa pamatan-on, pag-atubang sa ginatawag na peer pressure, ag pagkasayod sa mga kabaskog ag kahinaan.
Si Paul Adrian M. Pelayo, Adolescent Health and Development (AHD) Coordinator; Raffy T. Relator, AHD Assistant Coordinator; Devriz D. Demeterio, Administrative Officer I; at Vernadeth L. Bantang, isaeang educator halin sa STI College, hay presente sa nasambit nga kahiwatan.
Sa isaea ka interbyu, ginpahayag ni PHO-Aklan Mental Health Coordinator Psyche Mae V. Ruiz nga importante gid nga selebrahon ro Suicide Prevention Month agud mapaeapad pa ro pagpahisayod.
“Gina-highlight naton nga ro mental health hay dapat gina isturyahan ag indi naton taw-an it negatibo nga connotation,” hambae nana.
Gineksplikar man nana nga ro pagtaas it kasayuran hay makaguba it stigma.
“Kon bayluhan naton ro narrative parte sa makara nga stigma, mataw-an naton it gahum ro mga indibidwal nga makilaea ag mabuligan ro mga nagahimakas,” dugang ni Ruiz.
Ginaduso man ni Ruiz ro importansya it komunidad, nga gapakita it suportado nga palibot nga kung siin tanan hay mabatyagan ro komportable sa pagsugid sa andang baeatyagon ag pagpangayo it suporta.
“Normal eang nga kita hay makabatyag ag maghambae nga bukon healthy ro atong mental health,” she stressed.
Ginpasiguro man ni Ruiz nga ro andang promisa nga mga programa hanungod sa pagtapna it suicide sa probinsya hay tayuyon nga maiimplementar.
Gintaw-an man nana it haega ro kooperayon it mga local government unit ag mga municipal health officer it kada rural health unit, nga kung siin raya hay importante sa pagpaumwad it mental health literacy ag pagpanaba it stigma nga may kaangtanan sa pagpangayo it bulig para sa mga isyu sa mental health.
“Ro Aklan PHO nagapakig-angot sa nagakasari-sari nga mga LGU agud masiguro nga sanda makata-o ag makasuporta sa mga serbisyo sa mental health sa lokal,” dugang nana.
Naka-lista it kabilugan nga 42 ka mga insidente it suicide sa probinsya halin it Enero hasta Agosto makaron nga dag-on. (AGP/SQP/PIA Aklan)
