Ro probinsya it Aklan nakabu-oe it pang-ap-at nga pwesto sa tanan nga mga probinsya sa kategorya nga Locally Sourced Revenue (LSR) para sa dag-ong 2023 at 2022. (Photo courtesy of Provincial Government of Aklan)
KALIBO, Aklan (PIA) – Ginkilalaea ro gobyerno probinsyal it Aklan bilang isaea sa mga top-performing local government sa nasyon sa ginhiwat nga 37th Anniversary Stakeholders’ Recognition it Bureau of Local Government Finance (BLGF) nga ginhiwat sa Seda Manila Bay sa Parañaque City ku Oktubre 9, 2024.
Ro Department of Finance (DOF), paagi sa BLGF, ginselebrar ro mga kadaeg-an it mga nagapanguna nga probinsya, syudad, ag mga munisipalidad sa pagpabaskog sa pagmanehar it pundo it lokal nga gobyerno.
Pang-ap-at ro Aklan sa tanan nga mga probinsya sa kategorya nga Locally Sourced Revenue (LSR) para sa dag-ong 2023 at 2022.
“Rayang kadaeag-an hay nagapakita eamang sa atong insakto ag mayad-ayad nga pagmanehar it pondo it probinsya,” hambae ni Aklan Governor Jose Enrique Miraflores.
Suno sa gobernador, rayang pagkilaea hay isea nga produkto it padayon nga pagbinuligan sa tunga it nagkasari-sari nga mga opisina ag ro isaeang promisa sa mayad nga pagkolekta it kita.
“Saeamat sa atong mga dedikadong empleyado, sa atong mga stakeholders, ag eabi eon gid sa mga taxpayers sa inyong hugot nga pagsuporta,” hambae ni Miraflores.
Ro dag-onan nga programa sa pagkilaea it BLGF nagatumod sa pagpasidungog sa mga lokal nga panggobyerno nga nagapakita it pagka-ekselente sa pagdumaea it lokal nga mga kita nga isea ka importante nga parte sa pagpaum-wad it fiscal autonomy ag pagpauswag it serbisyong publiko.
“Padayon kita nga magbueuligan para sa ika-umwad it atong pinalanggang probinsya!,” suno kay Miraflores. (AGP/SQP/PIA-Aklan)
