Suno sa Commision on Elections-Aklan, may kabilugan nga 418, 565 ro narehistro nanda nga botante sa probinsya in Aklan ku Nobyembre 2024. Sa harang numero, 211,646 hay halin sa first district, samtang 206,919 mat-a ro botante halin sa second district it Aklan. (PIA Aklan)
KALIBO, Aklan (PIA) — Nakarekord it kabilugan 418,565 nga mga rehistradong botante ro Commission on Elections (Comelec) para sa paaeabuton nga nasyonal ag lokal nga eleksyon harang 2025.
Ro datus nagapakita it mabaskog nga turnout sa pagparehistro it mga botante sa tanan nga mga munisipalidad it daywang lehislatibong distrito.
Ginaeakipan it mga banwa it Libacao, Madalag, Kalibo, Banga, Batan, Balete, New Washington, ag Altavas ro primero nga distrito nga may nakarehistro nga 211,646 mga botante. May pinakaabo nga botante ro Kalibo nga nagaabot sa 53,724 samtang ro Madalag ro may pinakanaba nga 13,610.
Samtang, ro second legislative district nga ginaeakipan it Buruanga, Malay, Ibajay, Tangalan, Makato, Lezo, Malinao, Numancia, ag Nabas hay may 206,919 nga mga botante. May pinakanaabo nga rehistrado nga botante ro Malay nga nagaabot sa 40,878 samtang ro Lezo ro may pinakanaba nga may 10,305 botante.
Suno sa Comelec, ro numero it mga rehistradong botante hay direktang nakakaapekto sa resulta it eleksyon, tungod ro mga kandidatong may pinakamaabong boto ro naga daug.
Ro mataas nga voter turnout hay nagapasiguro nga ro mga naboto nga opisyales hay minatuod nga nagarepresentar sa kabubot-on it mga tawo.
Ro probinsya it Aklan may una nga 603 clustered precincts sa 330 voting centers para sa May 12, 2025 elections.
Nagpaguwa man it calendar of activities ag periods of certain prohibited acts ro Comelec nga naangot sa May 12, 2025, National and Local Election (NLE), ag BARMM Parliamentary Elections.
Sa Kapihan sa RMN-Kalibo it PIA-Aklan, ginhikayat ni Election Officer III ag information officer Chrispin Raymund Gerardo it Comelec-Aklan ro mga rehistradong botante ag ro publiko nga mangin pamilyarisado sa election calendar ag mga prohibited act sa tunga it election period.
Para sa paaeabuton nga eleksyon sa Mayo 12, gintaeana it Comelec ro general voting hours nga halin 7:00 a.m. asta 7:00 p.m. Pero pagabuksan it komisyon ro mga presinto halin 5:00 a.m. asta 7:00 a.m. para mataw-am it pribilehiyo ro mga botanteng senior citizen, nabdos, ag mga PWD. (AGP/SQP/PIA Aklan with reports from Kenth Luces of ASU-Banga)
