Si Dr. Leslie Ann L. Sedillo, Provincial Health Officer II it PHO-Aklan, gin-eksplikar ro kahaegan it pagselebrar it Sight Saving Month it probinsya ag raya ngani hay para mas mataw-an pa gid it importansya ro pagprotekta ag pag-alaga it mayad sa atong mga mata, kaibahan man ro pag-edukar sa publiko it mga nakaigong pamaagi sa pagbalik it naduea nga panan-aw. Ginlunsar man ro Eye Health Systems Strengthening and Integration (EHSSI) Project kadungan sa nasambit nga selebrasyon sa City Mall Kalibo. (Photo courtesy of Aklan IMAD)
KALIBO, Aklan (PIA) — Ginselebrar it Gobyerno Probinsyal it Aklan paagi sa Provincial Health Office iya ro Sight Saving Month ku Agosto 28, 2024, nga kung siin ginlunsar man ro Eye Health Systems Strengthening and Integration (EHSSI) Project sa City Mall Kalibo.
Suno kay Provincial Health Officer II Dr. Leslie Ann Sedillo, ginaobserbar it probinsya ro Sight Saving Month para mas mataw-an pa gid it importansya ro pagprotekta ag pag-alaga it mayad sa atong mga mata, kaibahan man ro pag-edukar sa publiko it mga nakaigong pamaagi sa pagbalik it naduea nga panan-aw.
Kaibahan sa harang selebrasyon ro paglunsar it Eye Health Project sa pakikipagpartner sa Fred Hollows Foundation, sa paghandum it pagtao it mayad nga serbisyo sa eye health sa mga Aklanon, eabi na gid sa mga mahina nga populasyon.
“Amon nga iga-implementar rayang proyekto sa mga munisipalidad iya sa Probinsya It Aklan. Napilian kita sa tanan nga mga probinsya sa bilog nga Pilipinas. An-om eang gid ro gin pili nanda ag kaibahan kara ro probinsya it Aklan,” hambae ni Sedillo.
“Handum namon nga mataw-an gid it haega ro importansya it pagpanan-aw. Sa tuod, may haeos daywang bilyon eon ro may visual impairment ag katunga kara pwede a kunta ma solusyonan kung na agapan agad. So ruyon aton kara nga gina solve, ag gina taw-an it solusyon,” pag-eksplikar ni Sedillo.
Ginpaniguro man ni Sedillo nga ro rayang proyekto hay maka benepisyo gid ro Indigenous People community ag ro sektor it Persons With Disabilities.
Suno kana nag allocate gid ro probinsya it resources para sa mga IPs ag PWD agud mas mauna sanda mataw-an it mga serbisyo dahil sanda ra ro sambilog sa madya uwa nataw-an gid it atensyon.
Idto man ro presensya ni Robby Bastareche, DMO IV it Department of Health, kaibahan kara si Dr. Ken Dela Cruz, Provincial Eye Center ophthalmologist, nga nagpresentar it gakasari-sari nga comprehensive lecture sa mga common eye disease ag gin eksplikar ro importansiya it eye health ag regular eye check-ups.
Sa pihak nga bahin, nagtao man it suporta ag pagpasaeamat sa pagbulig it The Fred Hollow Foundation of Australia si Sangguniang Panlalawigan member Bayani Cordova, Chairman it Committee on Health, ag suno kana makasalig gid ro pamueoyo it Aklan sa padayon nga pagsuporta it gobyerno probinsyal sa pag pahaeaga ag pag prayoridad sa eye health.
Sa nasambit nga aktbibidad, nagtao man it libreng vision screening ag libreng eyeglasses sa 30 nga benepisyaryo, kaibahan kara ro vulnerable populations (IPs and PWDs) paagi sa partner optometrists it PHO nga sanday Dr. Pinky Jhoanna B. Yap, Dr. Era Sibulangcal, ag Dr. Juliet Policarpio. (AGP/SQP/PIA Aklan kaibahan ro report ni Chantal Jade V. Tolores – GIP DOLE)
