SAN JOSE, Antique (PIA) — Amat-amat ron nga nakatibawas sa kahalitan kang El Niño ang probinsya kang Antique suno sa Provincial Disaster Risk Reduction and Management Council (PDRRMC).
Sa sangka pagsinapol, gin-isturyahan kang mga miyembro kang PDRRMC ang pagtapos kang state of calamity sa probinsya tungod sa pag-uran nga nagtuga kang pagsaka sa lebel kang tubig sa mga dam, suba, kag irigasyon.
Tungod sa padayon nga pag-uran kag opisyal nga pag-umpisa kang tig-ururan, nagapati ang Provincial DRRM Office (PDRRMO) nga pwede ron liwan makapananom ang mga mangunguma.
Nag-umpisa duman ang mga preparasyon kang Bureau of Fisheries and Aquatic Resources (BFAR) para sa andang mga aquaculture projects sa probinsya.
Nagnaba duman ang numero kang mga insidente kang sunog base sa datos kang Bureau of Fire Protection (BFP) Antique nga ginpalab-ot man ang pagnaba kang pagrasyon kang tubig sa mga komunidad nga naapektuhan kang tig-irinit.
Sa amat-amat nga pagtibawas kang mga sektor nga naapektuhan kang El Niño, ginakonsidera ron kang PDRRMC ang pagrekomenda sa Sangguniang Panlalawigan (SP) kang pagtapos kang state of calamity.
Ginahulat don lang kang PDRRMC ang Damage Assessment and Needs Analysis (DANA) nga datos halin sa mga kabanwahanan bag-o opisyal nga i-rekomenda sa Konseho ang nasambit nga tikang. (AGP/BPS/PIA Antique)
